Ինչը կարող է չեղարկել Իսրայելի գործողության արդյունքները․ Politico
Գազայի հատվածում Իսրայելի ցամաքային գործողությունը, որի հետևանքներն աճող քննադատություն են առաջացնում աշխարհում, իր նպատակին չի հասնի առանց տարածքում իրավիճակի կարգավորման միջազգային ծրագրի: Նման կարծիք է հայտնել Մեծ Բրիտանիայի պաշտպանության նախարարի նախկին խորհրդարանական տեղակալ, խորհրդարանի պատգամավոր Թոբիաս Էլվուդը Politico թերթում հրապարակված հեղինակային հոդվածում: Տեղեկությունը փոխանցում է ՏԱՍՍ-ը։
Թել Ավիվի պատասխանը արմատական պաղեստինյան ՀԱՄԱՍ շարժման հարձակումներին, նրա խոսքով, այժմ ակնհայտ վրեժխնդրության տեսք ունի՝ ուժի ցուցադրում ՝ առանց հաշվի առնելու երկարաժամկետ հեռանկարը: Իրավիճակը սրվում է խաղաղ բնակչության շրջանում աճող զոհերով, Գազայում սրվող հումանիտար ճգնաժամով։
«Ուժերի նման դասավորության դեպքում Իսրայելը շանս չունի հաղթելու ՀԱՄԱՍ-ի գաղափարախոսությանը՝ անկախ նրանից, թե որքան ահաբեկիչ կսպանվի։ Ավելին, դա իսկապես վտանգում է հասարակ պաղեստինցիների հետագա արմատականացումը՝ հաշվի առնելով շարժման հեռանալուց հետո որեւէ ծրագրի բացակայությունը կամ անվտանգության ապահովման ծրագիրը՝ թվարկելով այն միջոցները, որոնց օգնությամբ նրանց կարելի էր համոզել»,-կարծում է Էլվուդը:
Նա անհրաժեշտ է համարում գագաթնաժողովի անհապաղ անցկացումը, օրինակ՝ Միացյալ Թագավորությունում, Գազայի «հետպատերազմյան զարգացման» տարբերակները դիտարկելու համար՝ առաջին հերթին Իսրայելի, Եգիպտոսի, Հորդանանի, Կատարի, Արաբական Միացյալ Էմիրությունների, Սաուդյան Արաբիայի և ՄԱԿ-ի ներկայացուցիչների մասնակցությամբ՝ հաշվի առնելով Գազայի բնակչության շահերը:
«Հենց որ Իսրայելի պաշտպանության բանակը համոզվի, որ զինյալներն ու նրանց կառույցը ոչնչացվել են, այն պետք է անկլավում պատասխանատվությունը փոխանցի միջազգային խաղաղապահ ուժերին՝ իդեալականորեն ՄԱԿ-ի հովանու ներքո»-, ընդգծել է Էլվուդը:
Այնուհետև ոլորտում կառավարման գործառույթները կարող է ստանձնել տեխնոկրատական խորհուրդը, որը բաղկացած է այն երկրների ներկայացուցիչներից, որոնք 2020-2021 թվականներին ստորագրել են «Աբրահամի համաձայնագրերը»՝ Իսրայելի և Արաբական պետությունների միջև հարաբերությունների կարգավորման վերաբերյալ մի շարք պայմանագրեր։ Դրանց թվում են Բահրեյնը, Եգիպտոսը, Հորդանանը, Մարոկկոն, ԱՄԷ-ն և Սուդանը։
