Պաղեստինա-իսրայելական կոնֆլիկտի ֆոնին նավթը թանկացել է

Պաղեստինա-իսրայելական կոնֆլիկտի ֆոնին նավթի համաշխարհային բորսայական գները թանկացել են 4%-ով։

Կիրակի երեկոյան նավթի գներն աճել են, իսկ ԱՄՆ բաժնետոմսերի ֆյուչերսները նվազել են. սա առաջին արձագանքն է ՀԱՄԱՍ-ի հետ Իսրայելի պատերազմին, հայտնում է CNN-ը։

Չնայած Իսրայելը նավթի խոշոր արտադրող չէ, նավթով հարուստ Մերձավոր Արևելքում լարվածության աճը սարսափեցրել է ներդրողներին, որոնք վերջին շաբաթներին արդեն վաճառել էին նավթը:

Կիրակի երեկոյան ԱՄՆ-ում նավթի գներն աճել են 4%-ով՝ հասնելով բարելի դիմաց 86 դոլարի։ Brent տեսակի նավթը նույնպես թանկացել է մոտ 4 տոկոսով՝ բարելի դիմաց վաճառվելով շուրջ 88 դոլարով:

SPI Asset Management-ի կառավարիչ գործընկեր Սթիվեն Իննեսն ասում է, որ աճը, հավանաբար, պայմանավորված է թրեյդերների շրջանում «Մերձավոր Արևելքում աշխարհաքաղաքական էսկալացիային արձագանքելու «առաջինը գնիր, հետո հարցեր տուր» սկզբունքով: «Պատմական վերլուծությունը ցույց է տալիս, որ նավթի գները անշեղորեն աճել են Մերձավոր Արևելքի ճգնաժամից հետո», - գրել է նա:

Համաշխարհային ներդրողները մտավախություն ունեն, որ Մերձավոր Արևելքում երկարատև լարվածությունը կարող է վնասել համաշխարհային տնտեսության փխրուն վերականգնմանը: