Նիկոլ Փաշինյանը պարզաբանել է, թե որ դեպքում կստորագրվի խաղաղության պայմանագիր
«Եթե Ադրբեջանը հրապարակային իր նվիրվածությունը վերհաստատի այս սկզբունքներին, գործնականում մենք կարող ենք համարել, որ խաղաղության պայմանագրի կնքումը կարճ ժամանակի հարց է»․ ասել է Նիկոլ Փաշինյանը։
Ըստ նրա՝ սկզբունքներում ոչ մի նոր բան չկա։ Առաջին սկզբունքն, ըստ նրա, այն է, որ Հայաստանն ու Ադրբեջանը ճանաչում են միմյանց տարածքային ամբողջականությունն այն ըմբռնմամբ, որ Հայաստանի տարածքը 29․800 կմ² է, Ադրբեջանինը՝ 86.600 կմ²:
Վարչապետի խոսքով՝ Ալմա-Աթայի հռչակագիրը պետք է դառնա սահմանների դելիմիտացիայի և, հետագայում, նաև դեմարկացիայի քաղաքական հիմք: Սահմանազատումից առաջ, ըստ նրա, կարևոր է նաև համաձայնություն ձեռք բերել, թե որ քարտեզների հիման վրա է արվելու սահմանագծումն ու սահմանազատումը. «Մեր կարծիքով՝ դա պետք է տեղի ունենա 1975թ. քարտեզների վրա, բայց այնպես չէ, որ մեր դիրքորոշումը շատ կարծր է, որովհետև 1975թ հետո էլ են եղել քարտեզներ, որոնք, մեծ հաշվով, նույնի վերարտադրությունն են։ Երրորդ, կոմունիկացիաների բացումը տեղի է ունենալու երկրների սուվերենության, իրավազորության, օրենսդրության, հավասարության և փոխադարձության սկզբունքի հիման վրա»,- ասել է նա
Վարչապետի կարծիքով՝ Ադրբեջանի բարձրագույն պաշտոնյաները, ասելով, որ խաղաղության գործընթացին համաձայն են, չեն վերահաստատել իրենց հավատարմությունը. «Դա կասկածներ է առաջ բերում, որ խաղաղություն ասելով՝ նկատի ունեն իրենց որոշակի ենթադրյալ նկրտումները Հայաստանի տարածքային ամբողջականության նկատմամբ իրականացնելուց հետո»։
Փաշինյանին պարզ չէ՝ ինչն է խանգարում Ադրբեջանին՝ երեք սկզբունքների հիման վրա իր հետ երես առ երես զրուցելուն։
