«Ադրբեջանի կողմից Արցախի ղեկավարների ձերբակալությունը ուղերձ է հայ բնակիչներին՝ հաջորդը դուք եք». Բրեդ Շերման

Մեր աչքի առաջ տեղի են ունենում Արցախի էթնիկ զտումներ. հայերը լքում են ավելի քան 2000 տարվա իրենց տունը։ Ադրբեջանի կողմից Արցախի ղեկավարների ձերբակալությունը ուղերձ է հայ բնակիչներին՝ հաջորդը դուք եք. այս մասին իր ֆեյսբուքյան էջում գրել է կոնգրեսական Բրեդ Շերմանը:

«Ռուբեն Վարդանյանը (Արցախի նախկին պետնախարար) և բոլոր անարդարացիորեն ձերբակալվածները պետք է ազատ արձակվեն: Բայդենի վարչակազմը պետք է հրապարակայնորեն ասի Ադրբեջանին՝ կա՛մ հիմա վերջ տվեք այս ամենին, կա՛մ բախվեք պատժամիջոցների:

Անցյալ շաբաթ Կոնգրեսի Ներկայացուցիչների պալատի անդամ Քրիս Սմիթը և ես ներկայացրինք 5686 բանաձևը, որը պատժամիջոցներ է սահմանում Ադրբեջանի նկատմամբ՝ Արցախում իր ռազմական հանցագործությունների համար: 21-րդ դարն է. Միացյալ Նահանգները չի կարող աչք փակել էթնիկ զտումների վրա», - գրել է Շերմանը: