Ինչո՞ւ է բերման ենթարկվել Երևանի քաղաքապետարանի լրատվության վարչության նախկին պետը
ՀՀ ՆԳՆ ոստիկանության ծառայողները բերման են ենթարկել Երևանի քաղաքապետարանի լրատվության վարչության նախկին պետ Հովսեփ Կուբատյանին։ Այս մասին «Ֆեյսբուքի» իր էջում հայտնել է Կուբատյանը։
«Ծիծեռնակաբերդում այգում նստելու համար ինձ տանում են ոստիկանություն` Մալաթիայի բաժին։ Ոչ մի օրինական պահանջ, ոչ մի հիմք», - գրել է Կուբատյանը։
ՆԳՆ ոստիկանության լրատվական բաժնից Sputnik Արմենիային հայտնել են, որ Ծիծեռնակաբերդի տարածքից երեք անձ բերման է ենթարկվել Վարչական իրավախախտումների վերաբերյալ ՀՀ օրենսգրքի 182 հոդվածով (ոստիկանության ծառայողի օրինական պահանջը չկատարելը) նախատեսված արարքը կատարելու համար։
Հիշեցնենք՝ ավելի վազղ հայտնել էինք, որ Ծիծեռնակաբերդի խճուղում իրավիճակը շարունակվում է լարված մնալ, բերման են ենթարկել Հովսեփ Կուբաթյանին։
