Հոկտեմբերի 4-ին Միացյալ Նահանգների յուրաքանչյուր հեռուստատեսություն, ռադիո և բջջային հեռախոս կհեռարձակի հաղորդագրություն, որում գրված կլինի հետևյալ նախադասությունը. «Ոչ մի գործողություն չի պահանջվում»: Այս մասին գրում է The New York Times–ը:

Թեստի ծանուցումը կուղարկվի ԱՄՆ արևելյան ափի ժամանակով 14:20-ի սահմաններում: Թեստը կանցկացնի Արտակարգ իրավիճակների կառավարման դաշնային գործակալությունը՝ համագործակցելով կապի դաշնային հանձնաժողովի հետ: 

Նշվում է, որ թեստի նպատակն է ապահովել, որ ահազանգման համակարգը պատրաստ լինի հանրությանը տեղեկացնել արտակարգ իրավիճակների մասին: Եթե հոկտեմբերի 4-ին իրական արտակարգ իրավիճակ լինի, ինչպիսին է վատ եղանակը, պահեստային փորձարկման ամսաթիվ կսահմանվի հոկտեմբերի 11-ը:

Լրատվամիջոցը նշում է, որ սա կլինի թվով յոթերորդը, երբ ռադիոյով և հեռուստատեսությամբ իրականացվում է արտակարգ ահազանգման համակարգի համազգային փորձարկում, և կլինի երկրորդ թեստը, որը փոխանցվում է բոլոր բջջային սարքերին: 

«Դաշնային գործակալությունները ցանկանում են համոզվել, որ տեխնոլոգիան ճիշտ է աշխատում, ինչպես նաև ցանկանում են, որ մարդիկ իմանան նման նախազգուշացման գոյության մասին նախքան դրա կիրառումը», ասում է Կոլումբիայի համալսարանի աղետների պատրաստվածության ազգային կենտրոնի տնօրեն Ջեֆ Շլեգելմիլխը: 

«Ընդհանուր առմամբ, ահազանգերն արդյունավետ են միայն այն դեպքում, երբ մարդիկ գիտեն, թե ինչ են դրանք և գիտեն՝ ինչ անել դրանց հետ», - ասում է նա:

«Փորձարկումն անցկացվելու է նաև Հավայան կղզիների Մաուի կղզում, որտեղ սկսվել էին անտառային արագ տարածվող հրդեհներ, աղետ, որի ժամանակ տեղի արտակարգ իրավիճակների կառավարման գործակալությունը որոշում կայացրեց չմիացնել վթարային ազդանշանները, որոնք կարող էին մարդկանց զգուշացնել վտանգի մասին»,– գրում է լրատվամիջոցը: 

Թեև օգտակար է կիրառել համազգային արտակարգ իրավիճակների ահազանգը, շատ իրավիճակներ չեն պահանջում նման ծանուցում:

«Շատ քիչ դեպքեր կան, երբ դուք ինչ-որ բանի մասին կտեղեկացնեք ողջ երկրին», - ասում է Շլեգելմիլխը: 

Իր խոսքով՝ հասարակությունը սովորաբար ստանում է տեղական և տարածաշրջանային նախազգուշացումներ ծայրահեղ եղանակային պայմանների կամ համագործակցության մասին, օրինակ, երբ երեխա է անհետանում:  

«Բջջային սարքերին կարող են ուղարկվել մի շարք ահազանգեր: Անհայտ կորածների մասին ահազանգերը, որոնք նաև հայտնի են որպես Amber Alerts, տրվում են երեխաների առևանգման դեպքերում: Սպառնալիքի մասին ահազանգերը կարող են ուղարկվել ծայրահեղ եղանակային իրավիճակներում կամ ակտիվ կրակահերթերի ժամանակ մարդկանց վտանգից հեռացնելու համար, մինչդեռ հասարակական անվտանգության ծանուցումները կարող են օգտակար տեղեկատվություն առաջարկել, երբ անմիջական սպառնալիք չկա: Նախագահի ահազանգերը կարող են ուղարկվել ազգային արտակարգ իրավիճակների դեպքում»,– գրում է լրատվամիջոցը: 

ԱՄՆ-ն ավելի քան մեկ տասնամյակ է, ինչ շտապ ահազանգեր է ուղարկում հեռախոսներին, ըստ FCC-ի: Այլ երկրներ, ինչպիսիք են Նիդեռլանդները և Ճապոնիան, օգտագործում են նմանատիպ համակարգեր: Վերջերս՝ ապրիլին, Մեծ Բրիտանիան փորձարկեց արտակարգ իրավիճակների մասին ահազանգման իր նոր համակարգը: 

Ըստ լրատվամիջոցի՝ եղել են նաև կեղծ ահազանգեր. «2018 թվականի հունվարին Հավայան կղզիներում մարդիկ կեղծ արտակարգ ահազանգ ստացան՝ նախազգուշացվելով մոտեցող բալիստիկ հրթիռի մասին: Մոտ 38 րոպե է պահանջվել, որ նահանգը ուղարկի ևս մեկ ծանուցում՝ նախորդի սխալ լինելու մասին: Ահազանգ ուղարկած աշխատողը կարծում էր, որ պետությունը կանգնած է իրական սպառնալիքի առաջ»:
 

ԱՄՆ կապի դաշնային հանձնաժողովի համաձայն՝ բջջային հեռախոսների օգտատերերը կարող են մասամբ հրաժարվել ծանուցումներից: 

Անլար օպերատորները կարող են առաջարկել արգելափակել որոշակի ահազանգեր, որոնք ներառում են անվտանգության անմիջական սպառնալիքներ և Amber Alerts:
 

Սպառողները չեն կարող արգելափակել ազգային ահազանգերը: