ՏԵՍԱՆՅՈՒԹ․ Ասիական երկրները քննադատում են «Ֆուկուսիմա-1» ատոմակայանից ջրի բացթողումը

Ասիական երկրները քննադատում են «Ֆուկուսիմա-1» ատոմակայանից ռադիոակտիվ ջրի բացթողումը Խաղաղ օվկիանոս։ Այս մասին տեղեկանում ենք Deutsche Welle-ի ռուսական ծառայությունից։ Նշենք, որ Ճապոնիայի իշխանություններն այն սկսել են այսօրվանից:

«Օվկիանոսը ողջ մարդկության ընդհանուր սեփականությունն է, և «Ֆուկուսիմա»-ի միջուկային կեղտաջրերի հարկադիր բացթողումը չափազանց եսասիրական ու անպատասխանատու գործողություն է, որն անտեսում է միջազգային հանրային շահերը», - հայտարարել է Չինաստանի ԱԳՆ-ն: 

Պեկինի կարծիքով՝ Ճապոնիան «չի ապացուցել իր ծրագրի օրինականությունը» և «ռադիոակտիվ կեղտաջրերի մաքրման սարքավորումների երկարաժամկետ հուսալիությունը»։ 

Իր հերթին Հարավային Կորեան Տոկիոյին կոչ է արել թափանցիկություն ապահովել «Ֆուկուսիմա-1» ԱԷԿ-ից ջրի բացթողման գործընթացում։ Ըստ Հարավային Կորեայի վարչապետ Հան Դոկ Սուի՝ Ճապոնիայի իշխանությունները պետք է ողջ պատասխանատվությամբ բացահայտեն այս առնչությամբ տեղեկատվությունը և առաջիկա 30 տարվա համապատասխան պլանները: 

Ճապոնիայի այս քայլի դեմ ցույց է անցկացվել Սեուլում Ճապոնիայի դեսպանատան առջև։ Հարավային Կորեայի ոստիկանությունը ձերբակալել է առնվազն 16 մարդու, որոնք ակցիայի ժամանակ ներխուժել են դեսպանատան շենք։ «Ֆուկուսիմա-1» ԱԷԿ-ից ջրի բացթողման դեմ բողոքի ցույցեր են անցկացվել նաև ասիական մի շարք այլ քաղաքներում, այդ թվում՝ Հոնկոնգում և Տոկիոյում։