Բայդենը պատրաստ է հանդիպել Կիմ Չեն Ընի հետ «առանց նախապայմանների»
ԱՄՆ նախագահ Ջո Բայդենը պատրաստ է հանդիպել Հյուսիսային Կորեայի առաջնորդ Կիմ Չեն Ընի հետ՝ քննարկելու Կորեական թերակղզու ապամիջուկայնացումը։ Այս մասին հայտարարել է ԱՄՆ Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին։
«Մենք պատրաստ ենք առանց նախապայմանների նստել բանակցությունների սեղանի շուրջ»,- ասել է Քիրբին Kyodo News-ին տված հարցազրույցում: Նա հավելել է, որ Հյուսիսային Կորեայի իշխանությունները դեռ չեն արձագանքել առաջարկին։
ԿԺԴՀ արտաքին գործերի նախարարությունը մեղադրել է ԱՄՆ-ին և Հարավային Կորեային լարվածությունը միջուկային պատերազմի շեմին հասցնելու համար։ Օգոստոսին Հյուսիսային Կորեայի առաջնորդը հայտարարել էր, որ Կորեայի ժողովրդական բանակի պատրաստվածությունը կավելացվի «հարձակողական եղանակով»։ Կիմ Չեն Ընը նաև հրամայել է ավելացնել հրթիռների արտադրությունը՝ «ճնշող ռազմական հզորություն» ապահովելու և պատերազմին պատրաստ լինելու համար։
