Հաջիզադեն հաստատել է «Կոմերսանտի» հրապարակումը
Այսօր ռուսական «Կոմերսանտ» թերթում հրապարակված «Արցախն ընդդեմ Ղարաբաղի հոդվածում նշվում է, որ նախնական համաձայնություն է ձեռք բերվել այն մասին, որ Կարմիր խաչի միջազգային կոմիտեի (ԿԽՄԿ) կողմից Աղդամ-Ստեփանակերտ ճանապարհի օգտագործման դիմաց Ադրբեջանը հնարավորություն կստեղծի անցնելու «Լաչին» սահմանային անցակետով:
Մեկնաբանելով տեղեկությունը՝ Ադրբեջանի ԱԳՆ մամուլի ծառայության ղեկավար Հաջիզադեն հայտարարել է, որ միջազգային գործընկերների ջանքերի արդյունքում իսկապես պայմանավորվածություն է ձեռք բերվել, որ ԿԽՄԿ-ն կսկսի օգտագործել Աղդամ-Ստեփանկերտի ճանապարհը բեռների փոխադրման համար, իսկ դրանից 24 ժամ անց ԿԽՄԿ միջնորդությամբ կապահովվի Լաչինի ճանապարհի օգտագործման ակտիվացումը:
«Բացի այդ, ադրբեջանական կողմի առաջարկի հիման վրա համաձայնեցվել է Եվլախում հանդիպում անցկացնել ադրբեջանական կողմի ներկայացուցիչների և Ղարաբաղի ներկայացուցիչների միջև, ամփոփվել են լոգիստիկ բոլոր հարցերը։ Չնայած բոլոր պայմանավորվածություններին՝ ԼՂ ներկայացուցիչները վերջին պահին խախտել են դրանք»,- ասել է Հաջիզադեն՝ ավելացնելով, որ ՀՀ-ն ևս շահագրգռված չէ խաղաղությամբ և կայունությամբ, ինչպես նաև այդ ուղղությամբ երկխոսությամբ։
