Խորապես մտահոգված եմ Լաչինի միջանցքի շուրջ իրավիճակի վատթարացմամբ․ Կոլոմինա
Կովկասում ու Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան խորը մտահոգություն է հայտնել Լաչինի միջանցքի շուրջ իրավիճակի վատթարացման առնչությամբ։
«Խորապես մտահոգված եմ Լաչինի միջանցքի շուրջ իրավիճակի վատթարացմամբ։ Առանցքային է ազատ տեղաշարժի ապահովումն ու հրատապ հումանիտար կարիքների բավարարումն ապահովելը։ ՆԱՏՕ-ն բոլոր շահագրգիռ կողմերին կոչ է անում կրկնապատկել ջանքերը Հայաստանի և Ադրբեջանի միջև բանակցված խաղաղության համաձայնագրի հասնելու համար»,- «Թվիթեր»-ի իր միկրոբլոգում գրել է Կոլոմինան։
Նշենք, որ Ադրբեջանն ամբողջությամբ արգելափակել է Լաչինի միջանցքը, ինչի հետևանքով Արցախում հումանիտար ճգնաժամ է հասունացել։ Արցախում բնակչությունը զրկված է սննդամթերքի, դեղորայքի, վառելիքի, կենսական անհրաժեշտության այլ ապրանքերի մատակարարումներից։ Ադրբեջանն արգելափակել է նաև Արցախի գազամատակարարումն ու էլեկտրամատակարարումը։
