Երևանի և Բաքվի միջև տարածքային վեճերը պետք է լուծվեն սահմանազատման շրջանակում. ՌԴ ԱԳՆ
Հայաստանի և Ադրբեջանի միջև տարածքային վեճերի հարցերը պետք է լուծվեն հայ-ադրբեջանական սահմանի սահմանազատման և սահմանագծման գործընթացի շրջանակում։ Այս մասին ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով Արարատի և Տավուշի մարզերի յոթ «անկլավները» վերադարձնելու ադրբեջանական կողմի պահանջի վերաբերյալ Ռուսաստանի դիրքորոշման մասին հարցին։
«Մեզ հայտնի է այս հարցում Բաքվի դիրքորոշումը, հայկական կողմը ևս նման պահանջներ ունի Ադրբեջանին: Ելնում ենք նրանից, որ տարածքային վեճերը պետք է լուծվեն հայ-ադրբեջանական սահմանի սահմանազատման և սահմանագծման գործընթացի շրջանակում։ Այն (սահմանազերծման գործընթացը) համակարգվում է համապատասխան երկկողմանի հանձնաժողովի կողմից, և մենք ողջունում ենք այն փաստը, որ հուլիսի 12-ին, երկար ընդմիջումից հետո, տեղի ունեցավ չորրորդ հանդիպումը»,- ասել է Զախարովան։
Նրա խոսքով՝ Ռուսաստանը պատրաստ է կողմերին խորհրդատվական, փորձագիտական, փաստաթղթային աջակցություն ցուցաբերել բոլոր, նույնիսկ ամենաբարդ խնդիրների լուծման գործում։
Հիշեցնենք` հուլիսի 12-ին Հայաստան–Ադրբեջան սահմանին` ՀՀ Տավուշի մարզի և Ադրբեջանի Ղազախի շրջանի հատվածում, տեղի է ունեցել ՀՀ փոխվարչապետ Մհեր Գրիգորյանի ու Ադրբեջանի փոխվարչապետ Շահին Մուստաֆաևի 4–րդ հանդիպումը։ Ըստ պաշտոնական հաղորդագրության` կողմերը շարունակել են սահմանազատման հարցերի քննարկումը, անդրադարձել են կազմակերպչական և ընթացակարգային մի շարք հարցերի։
