Ադրբեջանը խոչընդոտում է հումանիտար բեռի մուտքը ԼՂ, այս գործելակերպն անընդունելի է. Փաշինյան

 Մենք խնդրել ենք, որ ՌԴ խաղաղապահ զորքի ներկայացուցիչներն ընդունեն բեռը և տեղափոխեն ԼՂ, որտեղ Լաչինի միջանցքի շուրջ 8 ամիս արգելափակված լինելու հետևանքով հումանիտար ճգնաժամ է հաստատված: Այս մասին այսօր` հուլիսի 27-ին, կառավարության նիստի ժամանակ հայտարարեց ՀՀ վարչապետ Նիկոլ Փաշինյանը: 

«ԼՀ հումանիտար ճգնաժամի պայմաններում ԼՂ ժողովրդին աջակցության կառավարման աշխատանքային խմբի որոշմամբ, խումբը ստեղծվել է իմ որոշմամբ, փոխվարչապետ Տիգրան Խաչատրյանի գլխավորությամբ:  Երեկ 361 տոննա հումանիտար օգնություն է ուղարկվել Լեռնային Ղարաբաղ, 19 բեռնատար ավտոմեքենաներով: Հումանիտար օգնությունը երեկ հասել է Սյունիքի մարզի Կոռնիձորի հատված, Լաչինի միջանցքի մուտքի հատված: Մենք խնդրել ենք, որ ՌԴ խաղաղապահ զորքի ներկայացուցիչներն ընդունեն բեռը և տեղափոխեն ԼՂ, որտեղ Լաչինի միջանցքի շուրջ 8 ամիս ապօրինի արգելափակված լինելու հետևանքով հումանիտար ճգնաժամ է հաստատված: Ադրբեջանը խոչընդոտում է հումանիտար բեռի մուտքը Լաչինի միջանցք և ԼՂ, այս գործելակերպն անհասկանալի է և անընդունելի: Լաչինի միջանցքը ապօրինի արգելափակելու Ադրբեջանի պատճառաբանությունն այն էր, թե իբր Հայաստանը միջանցքն օգտագործում է ռազմական նպատակներով: Սա անհեթեթ պնդում է, բայց այդ պնդումն օգտագործվում էր որպես պատրվակ` Լաչինի միջանցք ապօրինի արգելափակման համար»,- նշեց Փաշինյանը: