Ուկրաինայի Անվտանգության ծառայության ղեկավար Վասիլի Մալյուկը հայտնել է, որ 2022 թվականի աշնանը Ղրիմի կամրջի պայթեցման հետևում կանգնած են եղել իր գերատեսչության աշխատակիցները, փոխանցում է РИА Новости-ն։ 

«Կան շատ տարբեր գործողություններ, հատուկ գործողություններ, մի քանիսի մասին մենք կկարողանանք խոսել, որպեսզի բոլորը տեսնեն հաղթանակից հետո, մյուսների մասին ընդհանրապես չենք խոսի։ Իմ գործընկերն այսօր հագել է համապատասխան շապիկ. սա մեր իրականացրածներից մեկն է, այն է՝ անցյալ տարվա հոկտեմբերի 8-ին Ղրիմի կամրջի ոչնչացումը»,- ասել է Մալյուկը։

Հուլիսի 9-ին Ուկրաինայի պաշտպանության փոխնախարար Աննա Մալյարը հայտարարել է, որ 2022 թվականի աշնանը Ղրիմի կամրջի պայթեցման պատասխանատվությունը կրում են Կիևի իշխանությունները։ 

ՌԴ ԱԴԾ-ն հայտնել է, որ Ղրիմի կամրջի վրա ահաբեկչության կազմակերպիչը եղել է Ուկրաինայի ռազմական հետախուզության ղեկավար Կիրիլ Բուդանովը։ Ավելի ուշ երկրի Քննչական կոմիտեն հաստատել է, որ ահաբեկչության կազմակերպման հետևում կանգնած են Ուկրաինայի հատուկ ծառայությունները։