Թուրքիայում անոմալ շոգ է. օդի ջերմաստիճանը կհասնի մինչև 45 աստիճանի
Թուրքիայի զգալի մասում այս շաբաթ հաստատված շոգը մոտ 45 աստիճան կլինի։ Այս մասին հայտնել է «ՌԻԱ Նովոստին»:
Թուրքիայի օդերևութաբանության գլխավոր վարչության տվյալներով՝ երեկ Ստամբուլի ասիական կողմում գրանցվել է 39,7 աստիճան տաքություն, ընդ որում` ասֆալտը տաքացել է մինչև 50 աստիճան, իսկ բժիշկները, մասնավորապես Ստամբուլի Ջերահփաշայի համալսարանի բժշկական ֆակուլտետի պրոֆեսոր Իբրահիմ Իքիզջելին զգուշացրել է, որ ցանկացած մարդ, ով ավելի քան 15-20 րոպե մնա արևի տակ, կարող է արևահարվել:
Հարավային հանգստավայրերում իրավիճակն ավելի բարդ է։ Եթե Ստամբուլում շաբաթ օրը ջերմաստիճանը նվազել է մինչև 32 աստիճան, ապա Անթալիայում, Ալանիայում, Բոդրումում, Մարմարիսում, Մերսինում ու մի շարք այլ քաղաքներում ջերմաստիճանը հատել է +40–ի սահմանը` որոշ դեպքերում հասնելով +44–ի:
Թուրքիայում շոգի և օդորակիչների ու օդափոխիչների համատարած օգտագործման պատճառով հուլիսի 14–ին սահմանվել է էլեկտրաէներգիայի սպառման նոր ռեկորդ՝ ավելի քան 1 միլիոն 52 հազար մեգավատտ։
