Իրավապաշտպանի նկատմամբ բռնություն գործադրելու դեպքի առնչությամբ սկսվել է քննարկման ընթացակարգ. ՄԻՊ
Տարածված տեղեկությունների համաձայն՝ Գյումրիում Մուշի բաժնի քրեական հետախուզության աշխատակիցը խանութում հարձակվել է իրավապաշտպան Կարապետ Պողոսյանի վրա։ Հայտնում է ՀՀ մարդու իրավունքների պաշտպանի գրասենյակը։
«Դեպքի կապակցությամբ՝ Մարդու իրավունքների պաշտպան Անահիտ Մանասյանի սեփական նախաձեռնությամբ սկսվել է քննարկման ընթացակարգ։
Համապատասխան գրություններ կհասցեագրվեն ՀՀ գլխավոր դատախազություն և ՀՀ ներքին գործերի նախարարություն՝ նշված դեպքի հանգամանքները մանրամասն և բազմակողմանի քննության առարկա դարձնելու պահանջով։
Մարդու իրավունքների պաշտպանը ևս մեկ անգամ ընդգծում է. բռնության ցանկացած դրսևորում խիստ անընդունելի և դատապարտելի է: Այդ հանգամանքի հաշվառումն առանցքային նշանակություն ունի իրավապահ մարմնի յուրաքանչյուր ներկայացուցչի համար»,- նշվում է հաղորդագրության մեջ։
Հիշեցնենք` գյումրեցի իրավապաշտպան Կարապետ Պողոսյանը նախօրեին ահազանգել էր, որ հարձակման է ենթարկվել ոստիկանի կողմից.
«Ոստիկանության Մուշի բաժնի քրեականի աշխատող Արտակ Պողոսյանը, ցուցաբերելով բացահայտ ցինիզմ, խուլիգանության ակնհայտ դրսևորմամբ հարձակվել է վրաս՝ Գյումրիի Պ. Սևակ փողոցում գտնվող խանութում, որտեղ առկա են նաև տեսախցիկներ»,- մասնավորապես նշել էր Պողոսյանը:
