Զելենսկին պատժամիջոցներ է սահմանել հայկական «Air Dilijans» ավիաընկերության հիմնադրի դեմ
Վլադիմիր Զելենսկին պատժամիջոցներ է սահմանել 190 ֆիզիկական եւ 290 իրավաբանական անձանց նկատմամբ։ Ցանկում է հայտնվել վրացական Georgian Airways ավիաընկերությունը, որը վերսկսել է թռիչքները դեպի Ռուսաստան։ Պատժամիջոցները սահմանվել են 10 տարի ժամկետով։
Սահմանափակումների տակ է հայտնվել ոչ միայն վրացական ավիաընկերությունը, այլեւ նրա ղեկավարությունը, մասնավորապես Georgian Airways-ի տնօրեն, Ltd Piloti (404541830) եւ «Air Dilijans» հայկական ընկերության սեփականատեր Թամազ Գաիաշվիլին»,-նշում են ԶԼՄ-ները։
Հիշեցնենք, որ «Ավիակոմպանիա Արմենիա» («Aircompany Armenia») ընկերությունն 2023թ-ի մարտին հայտարարել էր, որ վերանվանվելու է «Air Dilijans»: 2015 թ. դեկտեմբերին հիմնադրված այս ավիաընկերությունը, որը թռիչքներ է իրականացնում 2016-ի ամառվանից, հայտնել է, որ անվանափոխության պատճառն այս պահին Հայաստանում համահունչ անվանումներով մի շարք ընկերությունների առկայությունն է:
«Որոշումը կայացվել է մեր ուղեւորների շահերից ելնելով, նրանց ժամանակը խնայելու եւ ավիաընկերության ծառայություններից օգտվելիս հարմարավետություն ապահովելու նպատակով»,- հայտարարել է ավիափոխադրողը:
