Պատերազմից հետո տարածաշրջանի օրակարգը մենք ենք սահմանում. Ալիև
«Բոլորն այսօր տեսնում են, որ ժամանակին Ղարաբաղի հայերի համար ինչ-որ կարգավիճակ պահանջող ուժերը արդեն լիովին այլ հայտարարություններ են անում։ Անգամ Հայաստանի ղեկավարներն են կրկնում իմ խոսքերը, որ «Ղարաբաղը Ադրբեջան է»: Այս մասին ասել է Ադրբեջանի նախագահ Իլհամ Ալիևը՝ ՊՆ հրամանատարության հետ հանդիպման ժամանակ:
«Մենք պատրաստվել ենք Ղարաբաղյան 2-րդ պատերազմին և դա չենք թաքցրել» ասել է Ալիևը՝ հավելելով, որ 2-րդ պատերազմից հետո տարածաշրջանի օրակարգը իրենք ենք սահմանում։
Ըստ Ալիևի` այսօր իրենց առաջնահերթ խնդիրներից մեկը բանակի կառուցումն է, մյուսը՝ «Ղարաբաղի» և «Արևելյան Զանգեզուրի» վերականգնումը:
Ի դեպ Ադրբեջանի նախագահի խոսքով՝ էապես ավելացել է իրենց երկրի մասնավորապես Պաշտպանության նախարարության հատուկ նշանակության ջոկատների թիվը։ Ալիևը հայտարարել է՝ նպատակը մեկն է՝ «պաշտպանել մեր տարածքը, ապահովել մեր երկրի տարածքային ամբողջականությունը և մեր անվտանգությանը սպառնացող վտանգի դեպքում ջախջախիչ հարվածներ հասցնել թշնամու ուժերին»։
