Պուտինը հայտարարել է, որ ՌԴ-ն Կիևի մերձակայքում ոչնչացրել է ամերիկյան Patriot հակաօդային պաշտպանության 5 համակարգեր
Ռուսաստանի նախագահ Վլադիմիր Պուտինը հայտարարել է, որ ռուսական զորքերը Կիևի մերձակայքում ոչնչացրել են ամերիկյան Patriot հակաօդային պաշտպանության 5 համակարգեր։ Այս մասին նա ասել է՝ ելույթ ունենալով Սանկտ Պետերբուրգի միջազգային տնտեսական ֆորումում։
«Եթե մենք քանդեցինք Կիևի մերձակայքում գտնվող հինգ Patriot համալիրներ, ապա ինչո՞ւ պետք է քանդենք Կիևի կենտրոնում գտնվող որևէ շենք և շինություն։ Նման սահմանափակումներ չկան։ Մենք դա չենք անում մի շարք պատճառներով»,- ասել է Պուտինը ֆորումում՝ պատասխանելով Ռուսաստանում անօդաչու սարքերի հարձակումների մասին հարցին։ Նախագահը հրաժարվեց մանրամասնել, թե ինչ նկատառումների մասին է խոսքը:
Ամբողջովին պարզ չէ, թե ինչ նկատի ուներ Վլադիմիր Պուտինը, երբ խոսում էր «5 Patriot համալիրների» մասին։ Պաշտոնապես Ուկրաինայի զինված ուժերը ստացել են երկու Patriot համալիրներ, որոնցից յուրաքանչյուրն ունի վեց արձակման կայան։ Մեկ մարտկոցը տրամադրել է ԱՄՆ-ը, երկրորդը՝ Գերմանիան։
Պուտինն իր ելույթի ժամանակ հավելել է, որ անօդաչու սարքերի հարձակումները Բելգորոդի շրջանի և Կրեմլի վրա Մոսկվային պատասխան գործողությունների սադրելու փորձ էր։ «Բոլորը սպասում են, որ մենք սկսենք կոճակներ սեղմել, բայց մենք դա չենք անի»,- ասել է նա։
