Քենիայում կրոնական աղանդի՝ սովելուց մահացած անդամների թիվը հասել է 303-ի
Քենիայում Good News միջազգային եկեղեցու մահացած անդամների թիվը հասել է 303-ի։ Այս մասին գրում է ТАСС-ը՝ հղում անելով այդ երկրի Կիֆիլի շրջանի պրեֆեկտ Ռոդա Օնյանչային։ Նշվում է, որ զոհերը կիրառում էին սովելու ծայրահեղ մեթոդներ։
Քենիայի ներքին գործերի և ազգային կառավարության համակարգման նախարար Կիտուր Կինդիկին ասել է, որ զոհերի թիվը կարող է աճել:
Ավելի վաղ The Star-ը հայտնել էր, որ այս աղանդի մահացած անդամների թիվը հասել է 179 է։ Այդ ժամանակ Ռոդա Օնյանչան հայտարարել էր, որ աղանդի 609 անդամ անհետ կորած է համարվում, որոնց հայտնաբերելու ուղղությամբ աշխատանքներ են իրականացնում։
Մայիսի 9-ին քենիական The Nation թերթը հաղորդել էր, որ Good News միջազգային եկեղեցու մահացած անդամներից հանել են ներքին օրգանները։
Մայիսի 1-ից փորձագետների հատուկ խումբը նշված կրոնական աղանդի անդամների մահվան հետաքննության շրջանակներում արևելյան Քենիայում արտաշիրիմված 112 դիակների դիահերձումներ է իրականացրել։ Պարզվել է, որ մեծ մասը մահացել է սովից: Այնուամենայնիվ, կան զոհեր, առաջին հերթին երեխաներ, որոնց խեղդամահ են արել։ Ոստիկանությունը չի բացառում, որ նրանց սպանել են հետագայում օրգանները հանելու նպատակով։
