ՆԱՏՕ-ն սկսել է դաշինքի պատմության մեջ խոշորագույն օդային զորավարժությունները
ՆԱՏՕ-ն երկուշաբթի Եվրոպայում սկսել է դաշինքի պատմության մեջ խոշորագույն օդային զորավարժությունները՝ «Օդային պաշտպան 23»-ը. դրանք համակարգում է Գերմանիան:
Զորավարժություններն անցկացվում են ի նշան ռազմական դաշինքի միասնության՝ ընդդեմ պոտենցիալ սպառնալիքների, հատկապես Ռուսաստանի կողմից, գրում է France 24-ը:
Գերմանիայի գլխավորած «Օդային պաշտպան 23»-ը կտևի մինչև հունիսի 23-ը և կներառի մոտ 250 ռազմական ինքնաթիռ ՆԱՏՕ-ի 25 անդամ և գործընկեր երկրից, ներառյալ Ճապոնիան և Շվեդիան, որը հավակնում է միանալ դաշինքին:
«Օդային պաշտպան 23»-ին կմասնակցի մինչև 10.000 մարդ:
Զորավարժությունները նախատեսված են ՆԱՏՕ-ի տարածքում քաղաքների, օդանավակայանների կամ ծովային նավահանգիստների վրա հարձակման դեպքում անօդաչու թռչող սարքերից և թևավոր հրթիռներից պաշտպանվելու համար փոխգործունակությունը և պատրաստվածությունը բարձրացնելու համար:
