Կհանդիպենք Հաագայում․ ԱՄՆ սենատորը՝ ՌԴ իշխանություններին

Ռուսական իշխանությունները ԱՄՆ սենատոր Լինդսի Գրեհեմի նկատմամբ հետախուզում են հայտարարել ուկրաինական պատերազմի մասին նրա հայտարարություններից հետո: Հաղորդում է Ազատությունը։

Լինդսի Գրեհեմը ձեռնոց է նետել Ռուսաստանի իշխանություններին։

«Ահա, թե ինչ եմ առաջարկում իմ ռուս «ընկերներին», ովքեր ցանկանում են ձերբակալել և դատել ինձ՝ ռուսական ռեժիմը որպես ռազմական հանցագործներ դատապարտելու համար։ Ես կենթարկվեմ Միջազգային քրեական դատարանի իրավասությանը, եթե դուք ենթարկվեք դրան», - ասել է Գրեհեմը։

«Ներկայացրեք ձեր լավագույն փաստարկները: Կհանդիպենք Հաագայում», - հավելել է նա։

Սենատորի նկատմամբ հետախուզում հայտարարելու առիթը Ուկրաինայի նախագահ Վլադիմիր Զելենսկու հետ Գրեհեմի հանդիպման տեսագրությունն էր, որում սենատորը, իբր նշում է, որ պատերազմում ռուսների մահը ԱՄՆ-ի փողերի հաջող օգտագործում է։

Սակայն, ավելի ուշ պարզվեց, որ տեսանյութը մոնտաժված է, և հանդիպման ամբողջական ձայնագրության մեջ մեկը մյուսի հետևից չեն հնչում Գրեհեմի արտահայտությունները ռուսների մահվան և փողի ներդրման մասին։