Ո՛չ ԵՄ-ն, ո՛չ Թուրքիան այլևս չեն ցանկանում, որ երկիրը անդամակցի Եվրամիությանը․ ԵԺԿ ղեկավար

Եվրախորհրդարանում Եվրոպական ժողովրդական կուսակցության (ԵԺԿ) ղեկավար Մանֆրեդ Վեբերը Funke մեդիա խմբին տված հարցազրույցում ասել է, որ ո՛չ ԵՄ-ն, ո՛չ Թուրքիան այլևս չեն ցանկանում, որ երկիրը անդամակցի Եվրամիությանը։ 

«Վերջին տարիները ցույց տվեցին, որ սերտ գործընկերությունը կարևոր է, բայց ոչ ոք չի ցանկանում Թուրքիայի լիիրավ անդամակցությունը ԵՄ-ին», - մեջբերում է Վեբերի խոսքերը ТАСС-ը։ 

Նա հիշեցրել է, որ անդամակցության բանակցությունները սկսվել են 2005 թվականին, սակայն գործնականում սառեցված են արդեն մի քանի տարի։ Խորհրդարանականի խոսքով, այս գործընթացը պետք է ամբողջությամբ դադարեցվի, քանի որ այն ավելի շատ խանգարում է, քան օգնում ԵՄ-ի և Թուրքիայի հարաբերություններին։ 

Միաժամանակ Վեբերը նշել է, որ ԵՄ-ն պետք է համագործակցի Թուրքիայի հետ Ուկրաինայի, միգրացիայի և տնտեսության հարցում։ 

«Այժմ Թուրքիայի նախագահ Ռեջեփ Թայիփ Էրդողանը պետք է անհապաղ հավանություն տա Շվեդիայի անդամակցությանը ՆԱՏՕ-ին»,- հավելել է ԵԺԿ ղեկավարը։ 

Նախօրեին նախագահական ընտրություններում Էրդողանը հաղթել էր ձայների 52%-ով։ 

Ավելի վաղ Politico-ն գրել էր, որ ասոցացման ընդլայնման դեպքում ԵՄ-ն պետք է ընտրություն կատարի Ուկրաինայի և Թուրքիայի միջև։