Կոսովոյի դեպքերի ֆոնին Սերբիայի նախագահը հանդես կգա հրատապ ուղերձով
Սերբիայի նախագահ Ալեքսանդր Վուչիչը երկուշաբթի երեկոյան հրատապ ուղերձ է հղելու երկրի քաղաքացիներին։ Այս մասին նշվում է պետության ղեկավարի մամուլի հաղորդագրության մեջ։
Կոսովոյի հյուսիսում բախումների ժամանակ ավելի քան 50 մարդ է տուժել։ Լրատվամիջոցը գրում է, որ Զվեչան քաղաքի քաղաքապետարանի շենքի դիմաց պայթյուններ են եղել, ավտոմեքենաներ են այրվում։
Սերբերը, ի նշան խաղաղ բողոքի, նստել են ուժայինների դիմաց։ Սակայն KFOR-ի աշխատակիցները սկսել են արցունքաբեր գազ կիրառել։
Հիշեցնենք՝ մայիսի 26-ի առավոտյան Կոսովոյի անվտանգության ուժերը ժամանել են չորս մունիցիպալիտետների քաղաքային վարչակազմերի շենքեր և փորձել գրավել դրանք։ Սերբիայի նախագահ Ալեքսանդր Վուչիչը Կոսովոյում իրավիճակի սրման պատճառով սերբական բանակը հասցրել է առավելագույն պատրաստվածության։Մայիսի 28-ին Սերբիայի պաշտպանության նախարար Միլոշ Վուչևիչը հայտարարել է, որ Կոսովոյում լարվածությունը հասել է գագաթնակետին և կարող է վերածվել զինված հակամարտության։
Այսօր էլ հաղորդվել է, որ ՆԱՏՕ-ի ուժերը Կոսովոյում և Մետոհիայում արգելափակել են շրջանի հյուսիսում գտնվող քաղաքապետարանների մուտքերը: Մի քանի հարյուր մարդ հավաքվել է նահանգի հյուսիսում գտնվող տեղական ինքնակառավարման մարմինների շենքերի մոտ՝ պահանջելով դուրս բերել Կոսովոյի ոստիկանությունը և հետ կանչել նորընտիր ալբանացի քաղաքապետերին։
