«Աշոտ Փաշինյանի և Գայանե Մարտիրոսյանի գործը դատարանի տիրույթում է». փաստաբան
Աշոտ Փաշինյանի և զոհված զինծառայող Ժորա Մարտիրոսյանի մոր` Գայանե Մարտիրոսյանի (Հակոբյանի) գործը դատարանի տիրույթում է։ Այս մասին մամուլի ասուլիսում հայտնեց Մարտիրոսյանի փաստաբանական խմբի անդամ Հովսեփ Սարգսյանը։
«Ուրբաթ օրվա վիճակով գործը մեղադրական եզրակացությամբ ուղարկվել է ՀՀ դատախազության համապատասխան դատավարական ղեկավարում իրականացնող դատախազին։ Եվ մեր ունեցած տեղեկություններով` գործով նյութերը այսօր մեղադրական եզրակացությամբ ուղարկվել են Երևան քաղաքի առաջին ատյանի ընդհանուր իրավասության քրեական դատարան։ Գործը թե ում մոտ է և ով է դատավորը՝ պաշտպանության կողմին հայտնի չէ»,–ասել է փաստաբանը։
Նրա խոսքով` նախաքննությունը տևել է բավականին կարճ` մայիսի 17–ից մինչև 25–ը։ 8 օր անց հայտարարվել է նախաքննության ավարտի մասին։
«Այդպիսով, նաև գործի նյութերն են տրամադրվել պաշտպանության կողմին և աննախադեպ նախանձելի հետևողականությամբ նախաքննությունն ավարտվել է, և այլևս գործը դատարանի տիրույթում է»,–ասել է Սարգսյանը։
Նա նաև հայտնեց, որ մինչև նախաքննության ավարտը հայտարարելը մինչդատական վարույթ իրականացնող մարմինը հայտարարել է նախկին հարուցված քրեական հետապնդումը փոփոխելու մասին` քրօրենսգրքի 191-րդ հոդվածի 2–րդ մասին առաջին կետով նոր քրեական հետապնդում հարուցելու մասով (Մարդուն առևանգելը անձի կամ նրա մերձավոր ազգականի կամ մերձավորի նկատմամբ` կապված այդ անձի կողմից իր պետական, քաղաքական, ծառայողական, մասնագիտական կամ հասարակական գործունեության կամ պարտքի կատարման հետ)։
