Էրդողանն ու Քըլըչդարօղլուն պատրաստվում են նախագահի պաշտոնի համար վերջին «մենամարտին»

Թուրքիայում ավարտվում է նախագահական ընտրությունների ձգձգվող գործընթացը, թեկնածուները մինչև շաբաթ օրը ժամը 18:00-ն ժամանակ ունեն քարոզարշավի համար։ Իրացիճակին անդրադարձել է ТАСС-ը:

Շաբաթ օրը՝ քարոզարշավի ավարտից 20 րոպե առաջ, երկու թեկնածուներն էլ կստանան հեռուստատեսությամբ հեռարձակման վերջին հնարավորությունը՝ ուղղված ընտրազանգվածին: Նրանք 10-ական րոպե կունենան, ինչպես պահանջում է ընտրական օրենքը, զուտ նախընտրական ելույթ ունենալու համար։ Կարգը որոշվում է վիճակահանությամբ, և այս անգամ ընդդիմադիր թեկնածու Քեմալ Քըլըչդարօղլուն ելույթ է ունենալու ժամը 17:39-ից 17:49-ը, իսկ գործող նախագահ Ռեջեփ Թայիփ Էրդողանը նախընտրական վերջին օրը կփակի ժամը 17:50-ից 18:00-ն։ Կադրում թույլատրվում է լինել միայն խոսնակին, նա պետք է լինի կոստյումով և փողկապով և ցուցադրի Թուրքիայի դրոշը։

Մայիսի 14-ի քվեարկությունից առաջ ակտիվ աժիոտաժից հետո թեկնածուների քարոզարշավը կիրակի օրը կայանալիք երկրորդ փուլի նախօրեին հանգիստ է ընթացել։ Մեծ հանրահավաքներ չեն եղել. Էրդողանը որոշել է հիմնականում կենտրոնանալ հեռուստաէկրանների միջոցով բնակչության հետ շփվելու վրա։ Նա մեկուկես-երկու ժամանոց մի քանի հարցազրույց է տվել հիմնական հեռուստաալիքներին։ Այս անգամ նա գրեթե չի անդրադարձել միջազգային քաղաքականությանը եւ խոսել է երկրի ներքին գործերի մասին։

Քըլըչդարօղլուն մի քանի հանրահավաք է անցկացրել, ինչպես նաև հարցազրույցներ տվել մի քանի լրատվամիջոցների։ Չորս ժամ շարունակ նա շփվել է երիտասարդների և ուսանողների հետ BaBaLa TV YouTube ալիքով։ Սա Թուրքիայի ամենավառ քննարկման հարթակներից մեկն է, որի իրադարձություններին մասնակցելը քաղաքական գործչի համար կարող է բավականին ռիսկային լինել՝ սադրիչ հարցերի հավանականության պատճառով, որոնց հանրությունն ակնկալում է հստակ պատասխաններ։

Քըլըչդարօղլուն նույնիսկ հեռուստահաղորդման ժամանակ Էրդողանին կոչ է արել բանվիճել, սակայն այս առաջարկը չի ընդունվել։ Ներկայիս ղեկավարն ասել է, որ մրցակցի հետ քննարկելու բան չունի։