«Խաղաղության պայմանագրի շուրջ ինտենսիվ բանակցություններ են ընթանում». Նիկոլ Փաշինյան

«Ռազմաքաղաքական իրադրությունը մեր տարածաշրջանում շարունակում է մնալ լարված». հայտարարել է վարչապետ Նիկոլ Փաշինյանն այսօրվա ասուլիսում։ Նրա խոսքով՝ կառավարությունը լարվածությունը հաղթահարելու առաջնային մեթոդ է համարում խաղաղության օրակարգի առաջմղումը. 

«Ադրբեջանի հետ խաղաղության և հարաբերությունների հաստատման պայմանագրի շուրջ ինտենսիվ բանակցություններ են ընթանում, և մենք հույս ունենք հնարավորինս արագ համաձայնության հասնել տեքստի շուրջ և ստորագրել այն»,- ասել է վարչապետը։

Նրա խոսքով՝ միջազգային հանրության ընկալումն ավելի շատ է հակվում այն բանաձևին, որ Հայաստանն ու Ադրբեջանն առանց վերապահումների պետք է ճանաչեն միմյանց 29.800 կմ² և 86.600 կմ² մակերեսով տարածքային ամբողջականությունը, և ԼՂ հայության իրավունքների ու անվտանգության ապահովման շուրջ Բաքվի և Ստեփանակերտի միջև տեղի ունենա երկխոսություն․ «Մենք համաձայն ենք այս տրամաբանությանն ու բանակցությունները վարում ենք այս տրամաբանությամբ՝ ընդգծելով, որ Ստեփանակերտ-Բաքու երկխոսության երաշխավորման միջազգային մեխանիզմները չափազանց կարևոր են»։

Ըստ նրա՝ Հայաստանի անվտանգության ապահովման ռազմավարական երաշխիքը խաղաղությունն է, որը հնարավոր է բոլոր հարևանների հետ հարաբերությունները կարգավորելու միջոցով. «Սա ամենևին էլ հեշտ գործընթաց չէ, բայց, կարծում եմ, այն է, ինչ ուզում և ակնկալում է մեր ժողովուրդը»։