Առավոտ դաշտի վրա են կրակել, բայց գյուղում իրավիճակը դեռ հանգիստ ա․ Կութի նախկին ղեկավար
Կրակոցներ լսում ենք, բայց գյուղի վրա չեն կրակում: Այս մասին 24News-ի հետ զրույցում ասել է Կութ համայնքի նախկին ղեկավար Սիմա Չիտչյանը:
«Մենք մեր երեխեքի հետ տանն ենք, սպասում ենք, առավոտ դաշտի վրա են կրակել, բայց գյուղում իրավիճակը դեռ հանգիստ ա»,-ասել է Չիտչյանը:
Կութ գյուղի վարչական շրջանի ղեկավար Գրիգոր Ավագյանն էլ ասել է, որ այս պահին վիճակը նորմալ է:
Հիշեցնենք, որ այսօր առավոտյան՝ ժամը 06:00-ից, Ադրբեջանի ԶՈՒ ստորաբաժանումները հրետանային և ականանետային միջոցներից կրակ են բացել Սոթքի ուղղությամբ տեղակայված հայկական դիրքերի ուղղությամբ:
Ժամը 08:00-ի դրությամբ՝ Ադրբեջանի ԶՈՒ ստորաբաժանումները շարունակում են հրետանային և ականանետային միջոցներից կրակը Սոթքի հատվածում տեղակայված հայկական դիրքերի ուղղությամբ:
Հայկական կողմը ժամը 08:00-ի դրությամբ ունի 3 վիրավոր: Ադրբեջանի զինված ուժերը կրակ են բացել վիրավորում ստացած զինծառայողին տեղափոխող շտապօգնության մեքենայի ուղղությամբ:
ՀՀ զինված ուժերի ստորաբաժանումները ձեռնարկում են համապատասխան պաշտպանական-կանխարգելիչ միջոցառումներ:
Պաշտպանության նախարարությունը հանդես կգա լրացուցիչ հաղորդագրությամբ:
