Իսրայելի հարվածների արդյունքով սպանվել են «Իսլամական ջիհադի» երեք հրամանատարներ իրենց ընտանիքներով
Երեքշաբթի առավոտյան Իսրայելի պաշտպանության բանակի ռազմաօդային ուժերը մի շարք հարվածներ են հասցրել ՀԱՄԱՍ-ի կողմից վերահսկվող Գազայի հատվածի թիրախներին։ Արդյունքում սպանվել են «Իսլամական ջիհադ» խմբավորման երեք դաշտային հրամանատարներ։ Պաղեստինյան կողմի տվյալներով՝ նրանց հետ մահացել է նրանց ընտանիքների եւս 10 անդամ։
Իսրայելը հայտարարել է, որ գործողություն է սկսել գրոհայինների դեմ, որոնք անմիջական վտանգ են ներկայացնում իր քաղաքացիների և երկրի անվտանգության համար:
Պաղեստինի առողջապահության նախարարությունը հայտնել է, որ զոհվածների թվում են վեց կին և չորս երեխա: Եվս 20 մարդ վիրավորվել է։
Երեքշաբթի վաղ առավոտյան 40 իսրայելական ռազմական ինքնաթիռներ և ուղղաթիռներ մի քանի ալիքներով հարվածներ են հասցրել Գազայի տներին և խուճապ առաջացրել բնակիչների շրջանում։
