ԱՄՆ-ն Ուկրաինային կփոխանցի M1 Abrams տանկերը, որոնցից նախապես կհանվեն գաղտնի բարձր տեխնոլոգիական բաղադրիչները, հայտնում է USA Today-ը՝ վկայակոչելով ամերիկացի անանուն պաշտոնյաներին։

«Ուկրաինացիները կստանան տանկեր, որոնք տեխնոլոգիապես ավելի քիչ զարգացած են և չեն պարունակի այնպիսի զգայուն բաղադրիչներ, որոնք Ռուսաստանը կարող է օգտագործել»,- ասել են ԱՄՆ երկու պաշտոնյաներ, որոնց թույլ չի տրվել հրապարակայնորեն խոսել այդ թեմայով»,- գրում է թերթը։

Ըստ ԱՄՆ պաշտոնյաների և ռազմական փորձագետների՝ «դա անհրաժեշտ նախազգուշական միջոց է, եթե Ռուսաստանը գրավի նման տանկ...»։

USA Today-ը հիշեցնում է, որ ԱՄՆ-ն ավելի վաղ որոշել էր Ուկրաինային փոխանցել M1 Abrams՝ M1A1 տանկերի հին տարբերակները։  Նշվում է, որ ավելի նոր մոդելները՝ M1A2-ը, ունեն բարելավված ուղղորդման համակարգ՝ համեմատած հին տանկերի հետ: 

Մարտին Պենտագոնի խոսնակ Փեթ Ռայդերը հայտարարել էր, որ ԱՄՆ-ն որոշել է Ուկրաինային հանձնել M1 Abrams տանկերի հին տարբերակները՝ մատակարարումն արագացնելու համար:  Միաժամանակ Ռայդերը չի հստակեցրել, թե Վաշինգտոնը քանի M1A1 տանկ է ցանկանում մատակարարել Կիևին։

Associated Press-ն իր հերթին նշել է, որ սկզբում խոսքը գնում էր Ուկրաինայի համար ավելի նոր տարբերակի՝ M1A2-ի 31 տանկի թողարկման մասին, որը կարող է տևել մեկից երկու տարի։