Քադիրովը ՌԴ ՊՆ-ին կոչ է արել կարգավորել «Վագների» խմբի շուրջ իրավիճակը

Չեչնիայի ղեկավար Ռամզան Քադիրովը Ռուսաստանի պաշտպանության նախարարությանը հորդորել է կարգավորել իրավիճակը «Վագների» խմբի շուրջ։

Քադիրովը դիմել է ՌԴ ՊՆ ղեկավար Սերգեյ Շոյգուին և Գլխավոր շտաբի պետ Վալերի Գերասիմովին՝ խնդրելով ուսումնասիրել «Վագների» խմբի շուրջ ստեղծված իրավիճակը։ Նա ՌԴ ՊՆ-ին կոչ է արել զինամթերք հատկացնել վագներականներին կամ պարզաբանել նրանց բացակայությունը։ 

Ինչպես նշել է Քադիրովը, պատերազմի ժամանակ արկերը միշտ քիչ են լինում։ 

«Ինձ համար տհաճ է լսել Եվգենի Վիկտորովիչի վերջին հայտարարությունները, և կրկնակի տհաճ է, որ ՌԴ ՊՆ ղեկավարությունը չի մեկնաբանում կամ չի հանդիպում «Վագների» խմբի ղեկավարության հետ որևէ որոշում կամ պարզաբանում ընդունելու համար»,- ասել է նա։ 

Քադիրովն ընդգծել է, որ պետության շահերը և երկրի անվտանգությունը պետք է առաջին տեղում լինեն հատկապես Հատուկ գործողության համատեքստում։ Նա հայտնել է նաեւ, որ «Ախմատ» հատուկ նշանակության ջոկատի մարտիկները պատրաստ են Արտեմովսկում (Բախմուտ) տեղակայվել «Վագների» թողած դիրքերում։

Ավելի վաղ «Վագների» խմբի ղեկավար Եվգենի Պրիգոժինն ասել է, որ մայիսի 10-ին խումբը Արտեմովսկում դիրքերը հանձնելու է ՌԴ ԶՈւ-ին և թիկունքում սկսելու է վերականգնել ուժերը։

Գործարարի մամուլի ծառայությունը հրապարակել է նաև պաշտոնական հայտարարություն արկերի բացակայության և մեծ կորուստների պատճառով իրենց ստորաբաժանումների ծանր վիճակի մասին։

Պրիգոժինը նաև ընդգծել է, որ ինքը բազմիցս հայտնել է զինամթերքի հետ կապված խնդիրների մասին և ռազմական գերատեսչությունից խնդրել է մատակարարումներ 2023 թվականի մարտից, սակայն խնդիրը երբեք չի լուծվել։