«Արևմտյան Ադրբեջանի» համայնքը նամակ է հղել ԱՄՆ պետքարտուղարին

Մտացածին «Արևմտյան Ադրբեջանի» համայնքը նամակ է հղել ԱՄՆ պետքարտուղար Էնթոնի Բլինքենին՝ խնդրելով Միացյալ Նահանգների աջակցությունը՝ ապահովելու ՀՀ-ից հեռացած ադրբեջանցիների խաղաղ, անվտանգ և արժանապատիվ վերադարձը Հայաստան։

Նամակում ասվում է, որ «Արևմտյան Ադրբեջանի համայնքը գործում է 1989 թվականից՝ պաշտպանելու Հայաստանից վտարված ադրբեջանցիների իրավունքները»։ Կազմակերպությունը ԱՄՆ պետքարտուղարին հասցեագրած նամակում, ինչպես և ակնկալվում էր, մեղադրանքներ է հնչեցրել հայերի հասցեին, նշել, թե իրենք, իբր, «ենթարկվել են էթնիկ զտումների, ինչպես նաև մշակութային ու կրոնական վանդալիզմի»։ 

«2020 թվականին Հայաստանի և Ադրբեջանի միջև պատերազմի ավարտը պարարտ հող է ստեղծում երկու երկրների միջև կայուն խաղաղության համար։ Բարձր գնահատելով Հայաստանի և Ադրբեջանի միջև միջպետական ​​հարաբերությունների կարգավորմանն ուղղված շարունակական ջանքերը, աջակցելով այդ գործընթացին նպաստելու ԱՄՆ ջանքերին, մենք կարևոր ենք համարում երկու երկրների միջև կնքվելիք համաձայնագրով ապահովել ադրբեջանցիների՝ Հայաստան վերադառնալու իրավունքը։ Սա կարևոր է երկու պետությունների միջև խաղաղության պահպանման համար։ 

Կոչ ենք անում Միացյալ Նահանգներին ամուր և հետևողականորեն պաշտպանել մեր մարդու իրավունքները՝ նպաստելով ՀՀ-ից հեռացած ադրբեջանցիների խաղաղ, արժանապատիվ և անվտանգ վերադարձին Հայաստան իրենց հայրենիք՝ նախաձեռնելով համապատասխան քաղաքական և անվտանգության նախաձեռնություններ, ինչպես նաև սոցիալական և տնտեսական աջակցության ծրագրեր»,-ասված է ադրբեջանցիների նամակում։