Ինչու՞ ճանապարհի մեր հատվածը իշխանությունները ժամանակին չեն կառուցել․ Օհանյան
«Իմ տեղեկությամբ՝ խնդիրը ծագել է դիրքային ճշգրտումների, ինժեներական կառույցների, սարքավորումների որոշակի բարելավումներ իրականացնելու ընթացքում, և հրապարակված տեսանյութից երևում է, թե ինչպես են ադրբեջանցիները մոտենում և հրահրող գործողություններ իրականացնում»,- այսօր լրագրողների հետ ճեպազրույցում ասել է ԱԺ «Հայաստան» խմբակցության ղեկավար, ՀՀ պաշտպանության նախկին նախարար Սեյրան Օհանյանը։
«Փորձը ցույց է տալիս՝ որքան էլ 44-օրյա պատերազմից հետո խոսում են զինված ուժերի մարտունակության անկման մասին, բայց, այնուամենայնիվ, որոշ տեղային հատվածներում որոշ ստորաբաժանումների մեր զինծառայողներ իրենց խնդիրը կատարում և հերոսություններ են ցուցաբերում, բայց կոնկրետ երեկվա դեպքի հետ կապված որոշակի խնդիրներ ունենք, քանի որ այն տեղի է ունեցել Հայաստանն Արցախի հետ կապող միջանցքի շրջանակներում», - ասել է Օհանյանը։ Նա հիշեցրեց, որ 2020թ․ նոյեմբերի 9-ի փաստաթղթում նշված է 3 տարվա ընթացքում ճանապարհի նախագիծ կազմելու, այնուհետ այլընտրանքային ճանապարհ կառուցելու մասին։
Օհանյանը հարց հնչեցրեց՝ ինչու՞ ճանապարհի մեր հատվածը իշխանությունները ժամանակին չեն կառուցել։
