29 հազար կմ² տարածքում Հայաստանի հարմարավետ ապրելու համար կա մեկ տարբերակ․ Ալիև
Ադրբեջանի նախագահ Իլհամ Ալիևը Հայաստանի առաջ պայման է դրել:
«29 հազար քառակուսի կիլոմետր տարածքում Հայաստանի հարմարավետ ապրելու համար կա մեկ տարբերակ՝ նա պետք է ընդունի մեր պայմանները, պաշտոնապես ճանաչի Ղարաբաղը որպես Ադրբեջանի տարածք, մեզ հետ ստորագրի խաղաղության պայմանագիր և սահմանազատման աշխատանքներ իրականացնի մեր պայմանների համաձայն։ Միայն այս դեպքում նրանք կկարողանան հարմարավետ ապրել 29,000 քառակուսի կիլոմետր տարածքում:
Եթե Հայաստանը չի ճանաչում մեր տարածքային ամբողջականությունը, ապա մենք չենք ճանաչում նաև նրա տարածքային ամբողջականությունը։ Հայաստանն ու նրա թիկունքում կանգնած կեղծավոր երկրները պետք է իմանան, թե ինչ հետևանք է լինելու։ Նրանք պետք է իմանան, որ մեր դեմ ոչ մի կեղտոտ ծրագիր չի իրականանա։
Մենք ունենք ուժ, ունենք ընկերներ, ունենք ուժեղ դիրք աշխարհում և ունենք ուժեղ կամք։ Մենք դա ցույց տվեցինք պատերազմի ժամանակ և հետպատերազմյան շրջանում»,- ասել է բռնապետը։
Հիշեցնենք՝ մոտ 100 օր է բռնապետ Ալիևը փաստացի գերեվարման մեջ է պահում Արցախի հայությանը։
