Պատահական չեն, որ սպանությունները տեղի են ունեցել հենց Լաչինի միջանցքում․ Փաշինյան
Միջազգային դատարանը, ինչպես հայտնի է, փետրվարի 22-ին որոշում էր հրապարակել, սակայն Ադրբեջանի Հանրապետությունը շարունակում է ապօրինի կերպով փակ պահել Լեռնային Ղարաբաղը Հայաստանին կապող Լաչինի միջանցքի միակ անցանելի ասֆալտապատ ճանապարհը։ Այս մասին քիչ առաջ կառավարության նիստին հայտարարեց վարչապետ Նիկոլ Փաշինյանը։
«Սրա արդյունքում հումանիտար իրավիճակը Լեռնային Ղարաբաղում շարունակում է մնալ լարված։ Միևնույն ժամանակ մենք տեսնում ենք Լեռնային Ղարաբաղի հետ շփման գծում իրադրությունը ռազմական առումով սրելու համար կոնկրետ գործողություններ Ադրբեջանի կողմից։ Սրա վերջին դրսևորումը Լեռնային Ղարաբաղում ոստիկանության երեք աշխատակիցների սպանությունն էր։ Հերթական այս միջադեպը տեղի է ունեցել Ռուսաստանի խաղաղապահ զորախմբի պատասխանատվության գոտում։ Կարևոր է արձանագրել, որ ՌԴ պաշտպանության նախարարությունը մարտի 6-ին տարածած հաղորդագրությունում հստակ արձանագրել է, որ միջադեպի նախաձեռնողը ադրբեջանական կողմն է։ Հաղորդագրությունում ասվում է նաև, որ Լեռնային Ղարաբաղի ու Ադրբեջանի ներկայացուցիչների մասնակցությամբ վարույթ է իրականացվում դեպքի մանրամասները պարզելու համար։ Այս առումով կարծում եմ, որ հատուկ գնահատականի պիտի արժանանա այն փաստը, որ Լեռնային Ղարաբաղի ոստիկանների սպանությունները տեղի են ունեցել Լաչինի միջանցքում»,- հավելեց նա։
