Ի՞նչ պաշտոն կստանա Վահան Հունանյանը. «Հրապարակ»

ՀՀ արտաքին գործերի նախարարության նախկին մամուլի խոսնակ Վահան Հունանյանը կնշանակվի Լեհաստանում ՀՀ դեսպանի պաշտոնին, գրում է «Հրապարակ» թերթը։

«Ներկայում այդ պաշտոնը զբաղեցնում է Սամվել Մկրտչյանը, սակայն նրա պաշտոնավարման ժամկետը` 4 տարին, վաղուց լրացել է, և, ըստ օրենքի, եթե դեսպանին իր զբաղեցրած պաշտոնից չեն ազատում, նա շարունակում է պաշտոնավարել»,–գրում է թերթը։

Լրատվամիջոցին չի հաջողվել կապ հաստատել Վահան Հունանյանի հետ և ճշտել տեղեկությունը։

ԱԳՆ նորանշանակ մամուլի խոսնակ Անի Բադալյանը լրատվամիջոցի տեղեկությունը ո՛չ հաստատել է, ո՛չ էլ հերքել։

«Այս պահին Վահան Հունանյանը շարունակում է իր դիվանագիտական ծառայությունը ԱԳՆ կենտրոնական ապարատում»,- ասել է նա։

Մարտի 13-ին  Վահան Հունանյանը սեփական դիմումի համաձայն ազատվել էր ԱԳՆ մամուլի խոսնակի պաշտոնից։ Նա հայտնել էր, որ իրեն կփոխարինի Անի Բադալյանը, իսկ ինքը դիվանագիտական ծառայությունը կշարունակի ԱԳՆ համակարգում։