ՏԵՍԱՆՅՈՒԹ․ Անկարգություններ Փարիզում․ կա տուժած
Փարիզում չորեքշաբթի ցուցարարները բախվել են ոստիկանության հետ՝ տարեսկզբից ութերորդ բողոքի ցույցերին ընդդեմ կենսաթոշակային բարեփոխումների : Ինչպես հաղորդում է ТАСС-ը, իրավապահներն արցունքաբեր գազ են կիրառել ցուցարարների դեմ։
Ֆրանսիայի մայրաքաղաքի հարավային մասում գտնվող Մոնպառնաս բուլվարում բախումներ են տեղի ունենում։ Ագրեսիվ ցուցարարները շշեր ու քարեր են նետել ոստիկանների ուղղությամբ, ջարդել խանութների ու գրասենյակների ապակիները, մասնավորապես վնասվել է զբաղվածության պետական ծառայության բաժինը։ Խուլիգանները կոտրում են գովազդային վահանակներն ու հրկիզում աղբամանները:
Ակցիայի մասնակից կանանցից մեկը վիրավորվել է, նրան օգնություն են ցուցաբերել բժիշկները։
Ոստիկանության ազգային վարչության տարածքային հետախուզական ծառայության կանխատեսումների համաձայն՝ Փարիզի ցույցերին պետք է մասնակցի 50 հազարից մինչև 80 հազար մարդ։ Արհմիությունների կողմից կազմակերպված բողոքի երթը մեկնարկել է Les Invalides-ի էսպլանադից և սպասվում է, որ կավարտվի ժամը 19:00-ին (Երևանի ժամանակով 20:00-ին) Փարիզի հարավում գտնվող Place d'Italia-ում: Մեքենաների և վերգետնյա հասարակական տրանսպորտի տեղաշարժը սահմանափակված է ողջ սյունակում։
Կենսաթոշակային համակարգի բարեփոխման նախագիծը հունվարի կեսերին ներկայացրել է Ֆրանսիայի վարչապետ Էլիզաբեթ Բորնը։ Կենսաթոշակային տարիքը մինչև 64 տարեկան բարձրացնելու հետ մեկտեղ այն ենթադրում է նվազագույն կենսաթոշակի բարձրացում մինչև 1,2 հազար եվրո և մի շարք հատուկ կենսաթոշակային ռեժիմների վերացում։
Սենատը (խորհրդարանի վերին պալատը) մարտի 11-ին հաստատել է կենսաթոշակային բարեփոխումների նախագիծը։ Օրինագծի վերջնական տարբերակը մարտի 15-ին պետք է համաձայնեցնի Ազգային ժողովի յոթ պատգամավորներից (ստորին պալատ) և յոթ սենատորներից բաղկացած համատեղ հանձնաժողովը։
