ՏԵՍԱՆՅՈՒԹ. 2-3 օր առաջ ստացել ենք Ադրբեջանի առաջարկը մեր նախագծի վերաբերյալ. Փաշինյան

Մի քանի օր առաջ Հայաստանը խաղաղության պայմանագրի վերաբերյալ արձագանք է ստացել Ադրբեջանից։ Այսօր ասուլիսի ժամանակ այս հայտարարությունն արեց ՀՀ վարչապետ Նիկոլ Փաշինյանը։ 

«Փետրվարի կեսերին ՀՀ-ի` խաղաղության պայմանագրի նախագծի վերաբերյալ հերթական արձագանքը փոխանցվել էր Ադրբեջանին, և երկու-երեք օր առաջ ՀՀ-ն ստացել է Ադրբեջանի արձագանքը»,– ասաց Փաշինյանը։ 

Նա նշեց, որ փաստաթղթում որոշակի առաջընթաց կա, բայց կան նաև ֆունդամենտալ պրոբլեմներ։ 
«Մեր ընկալմամբ` Ադրբեջանը փորձում է Հայաստանի տարածքային պահանջներ ձևակերպել, ինչը կարմիր գիծ է մեզ համար։ Ադրբեջանը փորձում է ԼՂ–ում ցեղասպանություն կամ էթնիկ զտումներ իրականացնելու մանդատ ձեռք բերել, դա նույնպես կարմիր գիծ է»,– ասաց նա։ 
Վարչապետն ընդգծեց` ցանկացած փաստաթուղթ, որ կստորագրվի Ադրբեջանի հետ, պետք է ունենա իրականացման երաշխիքներ, ցանկալի կլինի` միջազգային երաշխիքներ, սակայն դրանք, ըստ նրա, բացակայում են։