Հայկական կողմի արձագանքը` Մոսկվայի դժգոհություններին

Հայաստան Եվրամիության հարյուր դիտորդների տեղակայումից ժամեր անց պաշտոնական Մոսկվան դարձյալ հայտարարեց՝ քաղաքացիական առաքելության ներկայության մեջ տեսնում է բացառապես աշխարհաքաղաքական մոտիվ և ոչ իրական հետաքրքրություն՝ կարգավորելու հարաբերությունները Հարավային Կովկասում։ Այս մասին երեկ երեկոյան հայտարարել է Ռուսաստանի արտգործնախարարության ներկայացուցիչ Մարիա Զախարովան։

«Ցավոք, սա առաջին դեպքը չէ, երբ մենք արձանագրում ենք Եվրամիության և Արևմուտքի ձգտումը՝ ամեն կերպ ամրապնդվել մեր դաշնակից Հայաստանում։ Ամեն ինչ արվում է Ռուսաստանին տարածաշրջանից դուրս մղելու և թուլացնելու նրա պատմական դերը որպես անվտանգության գլխավոր երաշխավոր: Բաքվի հրապարակայնորեն արտահայտված բացասական գնահատականները այս նախաձեռնության մասին անտարբերության են մատնվում», - նշել էր Զախարովան:

 «Ազատություն ռադիոկայանը» հայտնում է, որ «Քաղաքացիական պայմանագիր» խմբակցության ղեկավար Հայկ Կոնջորյանը ասել է, թե այս գործընթացում որևէ աշխարհաքաղաքական ենթատեքստ չկա:

«Ադրբեջանը հարձակվել է Հայաստանի Հանրապետության ինքնիշխան տարածքի վրա, օկուպացրել է տարածքներ: Ըստ էության, Եվրամիության դիտորդական առաքելությունը նպատակ ունի՝ նպաստելու տարածաշրջանում կայունության հաստատմանը և աջակցելու նաև Հայաստանի և Ադրբեջանի միջև խաղաղության գործընթացին: Սա մեր կարիքներից բխող գործընթաց է», - նշել է նա :