«Մոլդովայի կառավարության կազմում փոփոխությունները կրում են կոսմետիկ բնույթ». Զախարովա

Մոլդովայի կուրսը դեպի Ռուսաստան նոր կառավարության ձևավորումից հետո դժվար թե փոխվի, չնայած այն հանգամանքին, որ Մոսկվան բաց է մնում Քիշնևի հետ համագործակցության համար։ Այս մասին հայտնել է ՌԴ ԱԳՆ պաշտոնական ներկայացուցիչ Մարիա Զախարովան։ Տեղեկատվությունը փոխանցում է regnum.ru-ն:

Նրա խոսքով, Մոլդովայի կառավարության կազմում փոփոխությունները կրում են կոսմետիկ բնույթ, քանի որ նրա 15 անդամներից 11-ը պահպանել են իրենց պաշտոնները։

«Այդ պատճառով, ցավոք, Քիշնևի կուրսը Ռուսաստանի նկատմամբ դժվար թե փոխվի», - ասել է Զախարովան։

Նա նշել է, որ Մոլդովայում նոր կառավարության ձևավորման գործընթացն ուղեկցվել է հակառուսական հռետորաբանության աճով։ ԱԳՆ ներկայացուցիչը հավելել է, որ Ռուսաստանն իր հերթին բաց է մնում պրագմատիկ և կառուցողական համագործակցության զարգացման համար՝ ի շահ երկու երկրների քաղաքացիների։

Հիշեցնենք, որ փետրվարի 16-ին Մոլդովայի նախագահ Մայա Սանդուն հրամանագիր է ստորագրել վարչապետ Դորին Ռեչենի գլխավորած կառավարություն նշանակելու մասին։ Նոր կաբինետում նախկին կազմի նախարարների մեծ մասը՝ Նատալյա Գավրիլիցայի գլխավորությամբ, պահպանել են իրենց պաշտոնները։ Թվայնացման հարցերով փոխվարչապետի պաշտոնը վերացավ, ստեղծվեց էներգետիկայի նախարարությունը։