«Ունենք համաձայնություն վերանորոգել Անիի կամուրջը». Միրզոյանի և Չավուշօղլուի հայտարարությունները

Թուրքիայի արտգործնախարար Մևլութ Չավուշօղլուն նշանակալի է համարել հայ գործընկեր Արարատ Միրզոյանի այցը Անկարա աղետալի երկրաշարժերից հետո, տեղեկանում ենք ՌԻԱ Նովոստիից։

«Ցանկանում եմ շնորհակալություն հայտնել Ձեզ այս այցի համար։ Կարծում եմ, որ այն կարևոր է։ Հայաստանը մեզ բարեկամության ձեռք մեկնեց նման բարդ պահին»,–հայտարարել է Չավուշօղլուն համատեղ մամուլի ասուլիսի ժամանակ։

Հավելենք, որ մինչև ասուլիսը տեղի ունեցած առանձնազրոյցի ժամանակ էլ երկու երկրների ԱԳ նախարարները քննարկել են Հայաստանի և Թուրքիայի հարաբերությունների կարգավորման գործընթացում հնարավոր քայլերը, պայմանավորվել արագացնել դրանք։

Չավուշօղլուն, ի դեպ, Երևանի և Անկարայի հարաբերությունների կարգավորման գործընթացում առաջընթացի հույս ունի, ինչը, նրա խոսքով, բարենպաստ իրավիճակ կստեղծի տարածաշրջանում։ 

 Արարատ Միրզոյանն էլ ասուլիսի ընթացքում մասնավորապես ասել է.

«Այս դժվար պահին ցանկանում եմ վերահաստատել տարածաշրջանում խաղաղություն հաստատելու և, մասնավորապես, Թուրքիայի հետ հարաբերությունների ամբողջական կարգավորման, դիվանագիտական հարաբերությունների հաստատման, Հայաստանի և Թուրքիայի միջև սահմանի ամբողջական բացման հարցում ՀՀ պատրաստակամությունը և ձգտումը։

Ունենք համաձայնություն համատեղ ջանքերով վերանորոգել Անիի կամուրջը, ինչպես նաև հոգ տանել համապատասխան ենթակառուցվածքների մասին, սահմանի ամբողջական բացման նախանշումով»,- ասուլիսի ընթացքում հայտարարել է ՀՀ ԱԳՆ նախարարը։