Մոսկվան չի հրաժարվում Ռուսաստանի, Ադրբեջանի և Հայաստանի ԱԳ նախարարների եռակողմ հանդիպումից. ՌԴ ԱԳՆ-ն՝ Լավրով-Միրզոյան-Բայրամով հանդիպման մասին
Մոսկվան չի հրաժարվում Ռուսաստանի, Ադրբեջանի և Հայաստանի ԱԳ նախարարների եռակողմ հանդիպումից, միջազգային օրակարգի արդիական հարցերին նվիրված մամուլի ասուլիսում ասել է ՌԴ փոխարտգործնախարար Սերգեյ Ռյաբկովը, հայտնում է News.ru-ն: Նրա խոսքով՝ Ռուսաստանն այս հնարավորությունը կօգտագործի:
«Հանդիպման կազմակերպման հարցը մշակվում է, մենք դրանից չենք հրաժարվում։ Մենք կօգտագործենք այս հնարավորությունը»,- ընդգծել է Ռյաբկովը։
Հիշեցնենք, որ Հայաստանի արտգործնախարար Արարատ Միրզոյանը հայտարարել էր Ռուսաստանի և Ադրբեջանի գործընկերներ Սերգեյ Լավրովի և Ջեյհուն Բայրամովի հետ հանդիպում կազմակերպելու պատրաստակամության մասին։ Ըստ նրա՝ Հայաստանը ոչ թե չեղարկել է արտգործնախարարների մոսկովյան հանդիպումը, այլ հետաձգել է այն, և մտադիր է օգտվել որոշակի հարմար պահին։
Հիշեցնենք, որ անցյալ տարվա դեկտեմբերին հանդիպման անհնարինության պատճառը Լաչինի միջանցքի շրջափակումն էր Ադրբեջանի կողմից:
Ռուսական կողմը հայտարարել է, որ պատրաստ է Մոսկվայում խաղաղության պայմանագրի նախագծի շուրջ բանակցությունների փուլ անցկացնել Հայաստանի և Ադրբեջանի արտգործնախարարների միջև։
