Հոլիվուդյան դերասան Ջո Մանգանիելոն խոսել է իր հայկական արմատների և ցեղասպանությունից փրկված տատի մասին

Ամերիկացի հայտնի դերասան Ջո Մանգանիելոն PBS-ին տված հարցազրույցում պատմել է Հայոց ցեղասպանությունը վերապրած իր մեծ տատի պատմությունը։ Այս մասին գրում է The People-ը։

«1915 թվականին՝ Առաջին համաշխարհային պատերազմի ժամանակ, թուրքերը մտան նրա տուն և ցանկացան շարունակել իրենց սկսած ցեղասպանությունը։  Գնդակահարել են նրա ամուսնուն և մորը։ Նրա երեխաներից 7-ը սպանվել են 7 այլ կրակոցներից»,- ասել է Ջո Մանգանիելոն։

47-ամյա դերասանը պատմել է, որ իր մեծ տատիկը այդ ժամանակ հատակին պառկած մեռած է ձևացել։

Նա անշարժ պառկել է այնքան ժամանակ, մինչև թուրքերը դուրս են եկել տնից՝ ութերորդ երեխային օրորոցում մատնելով սովամահության, ինչից հետո կինը երեխային կապել է մեջքից ու փախել։

Ջո Մանգանիելոն խաղացել է «Սարդ-մարդը», «Սուպեր Մայք», «Ի՞նչ սպասել, երբ երեխայի ես սպասում», «Սաբոտաժ» ֆիլմերում և «Իսկական արյուն» հեռուստասերիալում։