Արմեն Չարչյանը զրկվեց պատգամավորական անձեռնմխելիությունից
ՀՀ ազգային ժողովը գաղտնի քվեարկությամբ «Հայաստան» խմբակցության պատգամավոր, «Իզմիրլյան» ԲԿ նախկին տնօրեն Արմեն Չարչյանին զրկեց պատգամավորական անձեռնմխելիությունից։ Այսպիսով, նրա նկատմամբ հնարավոր կլինի հանրային քրեական հետապնդում հարուցել։
Հիշեցնենք, որ Չարչյանի դեմ միջնորդությունը խորհրդարանում ներկայացրել է ՀՀ գլխավոր դատախազ Աննա Վարդապետյանը։
Ընդդիմադիր պատգամավորին պատգամավորական անձեռնմխելիությունից զրկելուն քվեարկությանը 107 պատգամավորից մասնակցել է 68-ը։ Կողմ է քվեարկել 67-ը, դեմ և ձեռնպահ պատգամավորներ չկային, 1 քվեաթեթիկ անվավեր է համարվել։
Ըստ Վարդապետյանի ներկայացրած միջնորդության` Չարչյանն ակնհայտ կեղծ եզրակացություն է տվել քրեական գործի վերաբերյալ, որն առանձնապես ծանր հետևանքներ է ունեցել գործով մեղադրյալի համար` առաջացնելով Արթուր Սարգսյանի ( «Հաց բերող») մահը։ Վարդապետյանի խոսքով` պատգամավորը` որպես կրկնակի բժշկական հանձնաժողովի փորձագետ, Սարգսյանի առողջական վիճակի պատճառով դրական եզրակացություն է տվել կալանավորմանը, սակայն կասկածյալի հիվանդությունը եղել է կալանավորման հետ անհամատեղելի հիվանդությունների ցանկում։
Իսկ երեկ` փետրվարի 8-ին էլ խորհրդարանն անձեռնմխելիությունից զրկեց «Հայաստան» խմբակցության ղեկավար Սեյրան Օհանյանին։
