Ադրբեջանը պետք է դադարեցնի «բողոքի ցույցերը» Լաչինում. Մարդու իրավունքների միջազգային ընկերություն
Մարդու իրավունքների միջազգային ընկերության՝ Գերմանիայի մասնաճյուղի հայտարարության մեջ նշվում է, որ արդեն 57 օր է, ինչ Լեռնային Ղարաբաղում շուրջ 120 հազար հայ արգելափակված է ադրբեջանցի «ակտիվիստների» և զինվորների կողմից:
«Մենք տեղեկացել ենք, որ 19 երեխա, որոնց վերջերս թույլ են տվել վերադառնալ տուն, ենթարկվել են անարժան վերաբերմունքի և հետապնդումների։
Ռուսական ուժերի միջոցով տեղափոխման ժամանակ շարասյունը կանգնեցվել է, և մեքենաների մեջ նստել են ադրբեջանցի «բնապահպանները»։
Նրանք ապօրինաբար նկարահանել են երեխաներին և հոգեբանական բռնության ենթարկել նրանց, ինչի հետևանքով մեկ երեխա կորցրել է գիտակցությունը: Ադրբեջանը պետք է դադարեցնի Լաչինի միջանցքով երկու ուղղություններով ազատ տեղաշարժը արգելափակող «բողոքի ցույցերի» կազմակերպումն ու աջակցությունը»,- նշված է ընկերության հայտարարության մեջ:
Ըստ ընկերության՝ Ադրբեջանի կողմից ոչ մի ազդանշան չկա, որ ճանապարհը մոտ ապագայում կբացվի։
Նշվում է, որ թեև Միջազգային Կարմիր Խաչը կարողացել է մինչև Սուրբ Ծնունդը մի քանի տոննա սննդամթերք և դեղորայք բերել տարածաշրջան, սակայն մուտքի միակ ճանապարհը դեռևս արգելափակված է:
Ընկերության ղեկավար Ջոնաթան Սպանգենբերգի խոսքով, Լեռնային Ղարաբաղում ապրող հայերը ցանկանում են ապրել և մնալ այնտեղ: Մարդկային աղետը կանխելու համար Մարդու իրավունքների միջազգային ընկերության նախագահը գերմանական կառավարությունից հստակ խոսքեր է ակնկալում նաև այն պատճառով, որ օրեցօր մեծանում է ռազմական տեղակայման վտանգը։
