Այն, ինչ հիմա կատարվում է Մերձավոր Արևելքում և ինչ կլինի հետո, արդյունքն է այն ամենի, ինչ տեղի ունեցավ Արցախի հետ 2020 թվականին Ադրբեջանի, Թուրքիայի և միջազգային ահաբեկիչների ագրեսիայից հետո: Այս մասին թելեգրամյան իր ալիքում գրել է Արցախի ԱԳՆ նախկին ղեկավար, Արցախի նախագահի խորհրդական, հատուկ հանձնարարությունների գծով ներկայացուցիչ Դավիթ Բաբայանը։ 

«Փոքր Արցախ-Ղարաբաղն իսկապես հզոր վահան էր արմատականության և էքսպանսիոնիզմի շարժման դեմ»,- գրել է Բաբայանը։ 

Հիշեցնենք, որ Ադրբեջանը Թուրքիայի անմիջական աջակցությամբ և միջազգային վարձկանների ներգրավմամբ 2020 թվականի սեպտեմբերի 27-ին պատերազմ սանձազերծեց Արցախի Հանրապետության դեմ։ 44 օր տևած պատերազմի ընթացքում ադրբեջանական զինուժն Արցախի խաղաղ բնակավայրերը ենթարկել է հրետանային և հրթիռային հարձակումների, այդ թվում՝ արգելված զինատեսակների կիրառման։ 

Դեկտեմբերի 12-ից մինչ այժմ Արցախի Հայաստանին կապող միակ ճանապարհը` Լաչինի միջանցքը, շարունակում է փակ մնալ: