ՀՀ քաղաքացիներին կարգելեն դոլարով ու եվրոյով վարկեր ստանալ. ՔՊ–ն նոր նախագիծ է քննարկել

Գևորգ Պապոյանի, Արուսյակ Մանավազյանի ու Նարեկ Գրիգորյանի հեղինակած ««Արժութային կարգավորման և արժութային վերահսկողության մասին» օրենքում փոփոխություններ կատարելու մասին օրենքի նախագիծն այսօր քննարկվեց ԱԺ ֆինանսավարկային և բյուջետային հարցերի մշտական հանձնաժողովի նիստում։

Խորհրդարանի օրակարգ անցած նախագծի համաձայն` հայաստանյան բանկերը արտարժույթով վարկեր կկարողանան տալ միայն օտարերկրյա քաղաքացիներին։

ԱԺ «Քաղաքացիական պայմանագիր» խմբակցությունն առաջարկում է ՀՀ քաղաքացիներին արգելել դոլարով, եվրոյով կամ այլ արտարժույթով վարկեր վերցնել ՀՀ բանկերից ու վարկային կազմակերպություններից։

«Մարդու եկամուտները բացարձակապես դրամային են, սակայն շատ ռիսկային տեղում մարդը ներդրում է անում եվրոյի տեսքով, օրինակ` 400 դրամ փոխարժեքի ժամանակ քաղաքացիները եվրոյով հիփոթեքային վարկեր են վերցրել, և այսօր նրանք արդեն 430-440-ով են վճարում։ Պատկերացրեք` վաղը կարող է 700 դառնալ, որովհետև եվրոյի կուրսը տարբեր ժամանակներում շատ մեծ տատանումներ է ունենում, և կարող է պարզվել, որ այդ մարդը վարկի դիմաց վճարում է ոչ թե 4-5 տոկոս, այլ 50-60, որովհետև այդպիսի մեծ տատանումներ կարող են լինել»,– նշել է Պապոյանը։

Նրա խոսքով` այդ իրավիճակներում նաև վարկի մարման ռիսկեր են առաջանում։ Պատգամավորի ներկայացրած պաշտոնական վիճակագրության համաձայն` Հայաստանում «չաշխատող» (չվճարվող) վարկերը դրամային վարկերի մեջ 1 տոկոս են կազմում, իսկ արտարժութային վարկերի մեջ` 5-6 տոկոս։

Քննարկման ավարտին հանձնաժողովը դրական եզրակացություն տվեց ՔՊ–ական պատգամավորների օրենսդրական առաջարկին։ Նախագիծն առաջիկայում կներկայացվի խորհրդարանի դատին։

Ֆինանսավարկային և բյուջետային հարցերի մշտական հանձնաժողովի նախագահ Գևորգ Պապոյանը տեղեկացրեց, որ հայաստանյան բանկերը նախագծի վերաբերյալ որևէ առաջարկ կամ դժգոհություն դեռևս չեն ներկայացրել։