Հրեշավոր հարձակում է. Էրդողանը` Իրանում Ադրբեջանի դեսպանատան վրա հարձակման մասին

Թուրքիայի առաջնորդ Ռեջեփ Թայիփ Էրդողանը մեկնաբանել է Թեհրանում Ադրբեջանի դեսպանատան վրա հարձակումը։ Այս մասին գրում է Kp.ru-ն:
 

Նրա խոսքով՝ սա «հրեշավոր հարձակում է»։ Քաղաքական գործիչն ասել է, որ դատապարտում է դա և իր ցավակցությունն է հայտնում ողբերգական դեպքի կապակցությամբ։
 

«Խստորեն դատապարտում եմ Թեհրանում Ադրբեջանի դեսպանատան վրա տեղի ունեցած զազրելի հարձակումը, որը հանգեցրեց մարդու մահվան։ Ցավակցում եմ մեր ադրբեջանցի եղբայրներին ու քույրերին, իսկ վիրավորներին մաղթում եմ շուտափույթ ապաքինում»,- գրել է Էրդողանը։
 

Հունվարի 27-ին հաղորդվել էր, որ առավոտյան զինված հարձակում է իրականացվել Թեհրանում Ադրբեջանի դեսպանատան վրա։ Միջադեպի հետեւանքով մեկ մարդ մահացել է, եւս մեկը վիրավորվել։
 

Տեղական հրապարակումների համաձայն՝ հարձակումը տեղի է ունեցել մոտավորապես 8:30-ին։ Հարձակման զոհ է դարձել Ադրբեջանի իրավապահ մարմինների՝ դեսպանատան պաշտպանության համար պատասխանատու աշխատակիցը, ով դիմադրել է հարձակվողներին։