Հազարավոր մարդիկ դուրս են եկել Պերուի մայրաքաղաքի փողոցներ՝ դժգոհություն հայտնելու կառավարության աշխատանքից, հայտնում է interfax-ը` վկայակոչելով իսպանալեզու լրատվամիջոցներին։

Ոստիկանության աշխատակիցներն արցունքաբեր գազ են կիրառել ցուցարարներին ցրելու համար այն բանից հետո, երբ ցուցարարների և իրավապահների միջև բախումներ են սկսվել։

Բողոքի ցույցերը Լիմայում սկսվել են Պերուի նախագահ Դինա Բոլուարտեի մոտ երկու ամիս փողոց դուրս եկած ցուցարարներին «հրադադար» հաստատելու կոչից մի քանի ժամ անց: 

Ցուցարարների կողմից ճանապարհների փակումը և ենթակառուցվածքներին հասցված վնասը պատճառ են դարձել արտադրական գործոնեության դադարեցման, որը գնահատվում է ավելի քան 1 միլիարդ դոլար:

Նշվում է, որ Պերուի մայրաքաղաքում տեղի ունեցած բողոքի ակցիաները մասնակիցների թվով ամենամեծն էին և ամենաբուռնը։

Պերուում բողոքի ցույցեր են սկսվել դեկտեմբերի սկզբին իշխանության ճգնաժամից հետո: Դրանք ընդգրկել են երկրի 11 մարզեր։ Ցուցարարները պահանջում են երկրի նախագահ Դինա Բոլուարտեի հրաժարականը, խորհրդարանի ցրումը, 2023 թվականի ընթացքում համընդհանուր ընտրությունների անցկացումը և սահմանադրական ժողովի գումարումը։