Նախարարը հանձնարարել է խիստ վերահսկողություն սահմանել և չվճարել թերի կատարված աշխատանքների համար

 ՀՀ մարզերի համայնքների եկամուտների հավաքագրումը 2021 թվականի համեմատ փաստացի աճել է։ 2022 թվականին փաստացի հավաքագրման աճը կազմել է 8 մլրդ 036 մլն դրամ, առանց Երևան քաղաքի՝ 3 մլրդ 567 մլն, որը նախորդ տարվա համեմատ 13 տոկոսով ավել է։ Տվյալները ՀՀ տարածքային կառավարման և ենթակառուցվածքների նախարար Գնել Սանոսյանին հայտնել ենՀՀ մարզպետների խորհրդակցության ժամանակ, հայտնում է Սանոսյանն իր ֆեյսբուքյան էջում։ 


Խորհրդատվության ընթացքում քննարկվել է ՀՀ կառավարության ծրագրով նախատեսված 300 դպրոցի և 500 մանկապարտեզի կառուցման, վերակառուցման և հիմնանորոգման հետ կապված հարցեր։ 
Գնել Սանոսյանը հանձնարարել է խիստ վերահսկողություն սահմանել սուբվենցիոն ծրագրերի պատշաճ կատարման ուղղությամբ։ 
 

«Չընդունել և չվճարել որևէ աշխատանք, որն իրականացվել է թերություններով»,– ասել է նա։ 


Խորհրդատվության ընթացքում նախարարին է զեկուցվել «Տարածքային կառավարման մասին» օրենքում կատարված փոփոխությունների, ինչպես նաև ՀՀ մարզպետների աշխատակազմերի կանոնադրությունների, կառուցվածքի և դրանցից բխող աշխատանքների վերաբերյալ հարցերը։ 
 

«Զեկուցվել է նաև 2022 թվականին իրականացված ՀՀ համայնքների ենթակառուցվածքների զարգացմանն ուղղված սուբվենցիոն ծրագրերի վերլուծությունն ու 2023 թվականի սուբվենցիոն հայտերի ընդունման գործընթացը։ 2023 թվականի համար արդեն իսկ ստացվել է 447 հայտ 112 մլրդ նախնական ընդհանուր բյուջեով։ Ներկայացվել է նաև սուբվենցիաների մշտադիտարկման արդյունքները, արձանագրված թերությունները»,– գրել է Սանոսյանը։

 
ՀՀ մարզպետների հետ խորհրդակցութուններն այսուհետ կրելու են պարբերական բնույթ։

Քաղաքականություն

Պատահարներ