«Պաշտպանության նախարարն այս ամենի հետ չի կարող որևէ կապ ունենալ». Սիմոնյանը՝ վաշտի կացարանում բռնկված հրդեհի մասին
ԱԺ նախագահ Ալեն Սիմոնյանը լրագրողների հետ զրույցում անդրադարձավ Ազատ գյուղի վաշտի կացարանում բռնկված հրդեհին:
«Պաշտպանության նախարարն այս ամենի հետ չի կարող որևէ կապ ունենալ, որովհետև գործառույթի մասով ինքն ամբողջությամբ արել է իր աշխատանքը։ Պաշտպանության նախարարի վերաբերյալ քաղաքական այդ սակարկումները սին եմ համարում և անտեղի։ Կարևոր է այն, որ պատերազմից հետո պարոն Պապիկյանն իր վրա պատասխանատվություն է վերցրել բանակն այդ վիճակում վերցնել ու բարեփոխումներ սկսել»,– նշեց Սիմոնյանը։
Սիմոնյանն ասաց, որ Պապիկյանը բարեփոխումներ է իրականացնում` սկսած անձնակազմում փոփոխություններից, վերջացրած կահավորումից, որը բոլոր տեղերում փոխվել է և փոխվում է, և հիմա նաև դրսից տարբեր որակի և տարբեր բարձր մակարդակի կահավորում են ներմուծելու:
Լրագրողի այն դիտարկմանը, որ եթե մոդուլային զորանոցների մասին է խոսքը, սեպտեմբերից հետո էլ հնարավոր էր կահավորել և ոչ թե ճոխ ծախսեր անել, օրինակ՝ վարչապետի աշխատակազմի վերելակի համար, ծառայողական մեքենայի համար, պատգամավորների աշխատավարձերի, պարգևավճարների համար, Սիմոնյանը նշեց.
«ՀՀ-ն գումարի որևիցե խնդիր չունի բանակի վրա ծախսելու, և որևիցե դեպք չի եղել և չկա 2018 թ-ից սկսած, որ գումարի պատճառով մենք որևիցե գնում չկատարենք: Այնպես չի, որ կա գումար, որը որ ընտրություն է կատարվում վերելակի կամ մեքենայի վրա ծախսել, թե բանակի, և որոշում է կայացվում բանակի վրա չծախսել»,-ասաց Սիմոնյանը:
